https://e.pcloud.link/publink/show?code=kZGLArZakr42HHTOIF89PD1YDEwrf0RYQJk

人生最危險，唔係窮，唔係輸，而係未贏，已經開始慶祝。

豫卦係講「開心」，但《易經》呢本書，唔會鼓勵「開心過頭」。

雷地豫，上震下坤，雷喺地上震動，氣氛熱鬧、萬物鼓動，有動力、有士氣。

「豫」唔單止係娛樂，係一種「士氣高漲」、「人心振奮」嘅狀態。

問題嚟喇，《易經》從來唔怕你開心，佢只怕你失控地開心。

初六：鳴豫，凶。
《象》曰：「初六鳴豫，志窮凶也。」點解？

「鳴」唔係普通開心，係大聲表達、張揚、炫耀。
「豫」係安逸、享樂，

合埋即係，未有實力，就開始高調享樂，

一句白話，仲未企穩，就喺度開香檳。

「志窮凶也」，個人已經無再向上嘅志氣，咁就注定走向凶。

初六係最底層，但「應」九四，即係佢同權力核心有連結。

翻譯成人話：「你只不過係初級位置，因為有人罩你，你就以為自己好巴閉。」

於是失態、放縱、唔守規矩。

呢種「錯判自己位置」，就係災難開始。

講到「未成功先放縱」，三國最經典人物係曹植。

曹植生於192年，曹操第三子，十歲能誦辭賦數十萬言。
當場寫《登台賦》，震撼全場。

佢係建安文學頂流、文化明星、政治潛力股，問題係太早被寵、太早被認可，

曹植有三樣嘢，有才，有理想（想做聖君輔臣），但無節制，飲酒無度，恃才傲物。

寫信嘲諷陳琳「畫虎不成反為狗」，身邊朋友全部係同佢一樣驕傲嘅人，呢種人，《易經》點形容？

「鳴豫」，開心到出聲、甚至帶點炫耀。

217年嘅司馬門事件，呢幕戲最經典。
曹植飲醉酒，私自坐王室車駕，擅開司馬門（宮廷禁門），喺天子專用「馳道」上飛車。

結果？曹操震怒，守門官被處死。

曹植無死，但寵愛開始急跌。

《三國志》一句總結：「由是寵日衰。」

呢一刻，就係「鳴豫，凶」嘅現場版。
你以為係被寵，其實係被觀察。

219年，關羽攻樊城，曹操調曹植出征。
結果？曹植被灌醉，連軍令都接唔到，呢件事唔係失態，係政治死亡。

之後，曹植謀士楊修被殺。

217年，曹丕立為太子，曹植徹底出局。

由「鳴豫」變「哀歌」嘅曹植，被貶、被監視，封地貧瘠，無權無兵，多次上書求用，但全部被拒。

曹植寫出《洛神賦》，美但虛幻，《野田黃雀行》，有深度，但悲涼。

佢開始醒，但太遲。

豫卦唔係叫你唔開心，而係開心要有節制，得意，要識收。

初六最大問題係未成功，未穩陣，已開始享樂、炫耀。

用現代語言講，初創未賺錢就豪花，政治新星未站穩就高調，KOL未紅就開始「人設膨脹」。

你會見到好多，一爆紅就出事，一上位就翻車，全部都係「鳴豫」。

古代，曹植用才華壓倒一切，但輸在節制。

現代，有啲官員剛上位就高調炫權，有啲企業家上市後即刻套現、炫富，有啲網紅一紅就失言。

本質一樣，位置未穩，聲量先行。

王道長一句收結，「豫之吉，在節；豫之凶，在鳴。」

你可以開心，但唔好開心到畀人睇穿你未準備好。

曹植輸，唔係輸才華，係輸太早表現自己已經成功。

最後送一句畀大家：未到你嘅時候，靜，到咗你嘅時候，都唔好太嘈。