https://e.pcloud.link/publink/show?code=kZHmgoZjDA3ktwl4Oj9hCTQ0INeU5TEBjeX

有無試過，啱啱先開始一件事
就已經急住問人：
「幾時先做完啊？」

好多人，淨係掛住嗰個「終」
忘記咗「始」先係最緊要嗰一步

今集講吓
呢個成日被人忽略嗰個「始」字

呢個字，最早見得到
係喺西周嗰陣嘅青銅器銘文
即係我哋話嘅「金文」

左邊係一個「女」字

古時嗰個「女」
唔係企直直咁畫嘅
係彎低咗個腰
兩隻手交沓喺胸前
好似一個女性
跪坐低嗰個身影

右邊加咗一個「台」

呢個「台」係讀「怡」嗰個音

「台」最初無而家嗰個「口」
淨係一個彎彎哋嘅符號
有人話，似一個人
攬住個包袱咁嘅形狀

後尾先加咗個「口」落去
變成而家見到嗰個「台」

「女」同「台」點解會夾埋一齊
變成「開始」嘅「始」？

有一種講法
係《說文解字》嗰種
話「始，女之初也」
即係話，你（汝）最初嗰種狀態

另一種講法，我更鍾意
畫面感過癮好多

「台」呢個字本身通「怡」
即係「開心」嘅「怡」

意思即係，一個女人
啱啱發現自己有咗身己
嗰種又驚又喜嘅心情
就係「始」

女人一隻手輕輕攬住肚
心入面又緊張又歡喜
知道自己即將帶住一個新生命

呢個先係「開始」
最原本嗰種感覺

唔係冷冰冰嘅「第一步」
係一種帶住期待
帶住溫度嘅「萌芽」

喺西周金文入面
「始」同「姒」
本來就係同一個字

「姒」就係上古母系社會
最早嗰個做母親
做祖先嗰個女人嘅姓

即係話，「始」最原始嗰種身份
就係「始祖」呢個角色

講完字形，去睇吓
古人點樣用呢個字

老子《道德經》入面
「始」有多層深義

第一章
無名，天地之始，有名，萬物之母

即係話，喺天地未有名之前
嗰種混沌未分嘅狀態
先係真正嘅「開端」

呢句唔係講一件事嘅開頭咁簡單
係講緊「乜都仲未成形」嗰一刻

第三十二章「始制有名」
治理天下要建立一種管理體制
制定各種制度確定各種名分
任命各級官長辦事

第五十二章
「天下有始，以為天下母」
天地萬物本身都有起始
呢個始作為天地萬物嘅根源

第六十四章
「千里之行，始於足下」
千里遠行從腳下第一步開始走出來

《荀子·王制》
天地者，生之始也
禮義者，治之始也
君子者，禮義之始也

天地係生命嘅本源
禮義係治國嘅本源
君子係禮義嘅本源

「始」同「生」
一直都係綁埋一齊嘅

呢個又同頭先講嗰
「懷孕、萌芽」嘅畫面，接得上

《禮記》有句話，叫「君子慎始」
即係「君子做人做事
最緊要小心嗰個開頭」

點解要慎始？
因為好多結果
早喺開頭嗰一刻
已經定咗七、八成

開頭先行差一步，之後點救都好
都係辛苦嘅

「始」係因、「終」係果
有乜嘢嘅開始就會導致乜嘢結果

《禮記·經解》：《易》曰：
君子慎始，差若毫釐，繆以千里

君子重視事物開頭
開頭若有一絲一毫偏差
後來的結果就會造成千里之遠嘅錯誤
剛開始偏一點點，愈偏愈遠

《管子·小問篇》
齊桓公到馬棚察看
問：馬棚裏何事最難？

管仲答：傅馬棧最難

前面嘅決定，決定後面嘅結果
最開始嗰根木牌傅對
良性開局，循次而進
整個馬廄直木林立，再無後憂
如果開始嗰根木牌傅錯
會形成惡性循環，後面憂患無窮

呢段話常用嚟引申「慎始」道理
任何事物嘅開端和基礎（即「始」）
決定後續發展成敗

《千字文》：始製文字，乃服衣裳

喺黃帝嗰個年代
以前嘅人無文字
凡事靠口講、靠記憶

好多知識、好多歷史
一代傳一代，傳到後嚟
走樣、甚至失傳

到咗嗰個時候，「始制文字」
即係開始創製文字

人類先由純粹靠口耳相傳
變成識得用符號記錄落嚟

「始」呢個字
喺呢度用得幾巴閉

唔係講一件小事嘅開頭
係講緊整個文明嘅開端

由無文字到有文字
呢個先叫做真正嘅「起始」

清代學者朱駿聲《說文通訓定聲》
裁衣之始為初，草木之始為才
人身之始為首為元
築牆之始為基，開戶之始為戽
子孫之始為祖，形生之始為胎

裁衣之始為初：
裁布係製作衣服嘅第一道工序
代表事物最初開端

草木之始為才：
草木初生時嘅質樸狀態稱為「才」
後來引申為才能、材質
代表一切發展嘅潛能

人身之始為首為元：
人體的開端在於頭部
首與元皆代表最上、最先部位

築牆之始為基：
建造房屋或牆壁，開端係打好地基
象徵根基係一切結構嘅穩固關鍵

開戶之始為戽：
戽由「戶」與「斗」組成
本義為從門戶中往外汲水或舀水
古人推開門戶嘅動作
象徵一天開始
所以借用嚟形容開門嘅初始

子孫之始為祖：
「祖」代表開基立業嘅人
例如始祖、太祖
佢哋嘅後代叫做子孫

形生之始為胎：
《顱囟經》記載
成胎之後，精氣凝結形成胞胎
逐漸長出胚胎、孕育魂魄鳄埋臟腑

拉返去現代
「始」呢個字，由古到今
意思愈用愈闊

最初，佢可能係好貼身
好具體嘅一幅畫面

女性、懷孕、歡喜、萌芽

慢慢佢變成一個好抽象
好通用嘅字

凡係「第一步」
「最先嗰個狀態」
都可以叫「始」

「始祖」係一個家族
一個學派嘅第一個人

「始終」係由頭到尾

「始料不及」
係「一開始，估都估唔到會咁」

「始作俑者」本來係講
第一個用木頭、泥土
整成人形嚟陪葬嘅人

後尾變成罵人嗰句：
「呢啲衰嘢，係邊個先搞出嚟嘅」

呢個字，由講緊女性身形
講緊懷孕、講緊萌芽
一路演變到而家
可以用嚟講
任何事情嘅第一步

第一個人
甚至係第一個惹禍嘅人

意思闊咗好多
但核心嗰粒種子，其實無變過

永遠都係「由無到有」嗰一下

攞返「始」最原本嗰個畫面
一個女人，一隻手攬住肚
心裏面，又緊張，又歡喜

呢幅畫面，提醒我哋
人生入面，唔少嘢
唔係靠蠻力、唔係一步登天
係靠一個好耐性嘅開端

種子唔會即刻變樹
懷胎都要時間先出世

你今日埋頭苦幹嗰件事
可能而家仲淺、仲細
但只要嗰粒種，落咗地
「始」已經算數

你日常用「始」呢個字嗰陣
係開始、始終，定係始料不及