https://e.pcloud.link/publink/show?code=kZ0T6rZgylCR8UO7jFqSYsjYvX7oyj0JaJ7

今集我哋講呢個字，好得意，同一個字，可以係「大聲喊」，又可以係「名稱代號」，甚至係「發號施令」，呢個字，就係「號」。

「號」如果只係當係「編號」、「帳號」，係好後期嘅意思，最原始，反而同聲音有關，而且仲係好大聲嗰種。

我哋由字形講起。

《說文解字》點講？
一句好關鍵：「號，呼也」。
即係大聲叫。

再睇字形結構，「號」係從「虎」，加上發聲嘅部件。

點解會有「虎」？

因為古人覺得，老虎嗰種吼叫聲，最有代表性，響、猛、震住人。

「號」最初畫出嚟，唔係人名、唔係記號，而係一種聲音畫面，好似猛獸咆哮咁，大聲呼喊。

之後意思就慢慢引申。

由「大聲叫」→變成「呼喚」、「號召」→再變成「宣稱」、「稱呼」→最後先發展出「名號」、「記號」、「編號」。

即係話，今日用嘅「電話號碼」，源頭係有人喺度大聲叫。

講到經典用例，「號」喺古書入面好多時都係「喊」或者「呼」。

《易經》有一句：「先號咷而後笑。」
意思係先大聲哭，之後先笑。

呢句好人性，好多事情，情緒係有過程，唔係一開始就冷靜。

例如《岳陽樓記》：「陰風怒號」
風大到，好似喺度怒吼，呢個「號」，就係聲音畫面。

另一條線，開始變成「名號」。

例如「號曰醉翁」，歐陽修自稱「醉翁」，或者「國號」、「年號」。

呢個時候，「號」已經由聲音，變成一種「被叫出嚟嘅身份」。

返到《千字文》呢一句：「劍號巨闕，珠稱夜光。」

呢個「號」，唔係喊，唔係叫，而係「稱為」。

即係話呢把劍，叫做「巨闕」。

「號」喺呢度嘅作用，係「命名」。

佢唔用「名」，唔用「叫」，偏偏用「號」。點解？

因為「號」本身帶有一種被認可、被傳開、甚至帶少少權威嘅意味。

唔係自己亂改個名，而係呢個名，係大家叫開、認同嘅。

古代皇帝有「年號」、文人有「別號」。

你自己話自己係「第一」，無用，如果「天下人都咁號你」，先有份量。

呢個就同《易經》有關。

《易經》講「名實相符」。

一個「號」，唔應該係空嘅，要配得上。
如果名過其實，就會出問題。

《史記》講項羽：「號百萬」，實際四十萬，但對外話自己百萬，呢個就係「號稱」。

廣東話都有，「講到自己好巴閉，原來得個號。」
即係有名無實。

去到現代，「號」更加無處不在。
電話號碼、身份證號碼、帳號、座號、病號。

現代社會，係一個「被編號」嘅世界，每個人都有一堆「號」。

問題係，你係咪只剩下一個號？
定係仲有你自己真正嘅「名」同「實」？

再簡單啲講，你IG個account幾靚都好，如果入面無內容，都只係個「號」。

報紙因為要送檢，或日後要搵返，存檔唔係按日期，而係按「號」，第一日出嘅報紙，係「一號」，如此類推，每日只能有一個「號」。
有大新聞發生，出多一份報紙，因為唔啱報紙編號要求，所以叫做「號外」，即係編號以外。

最後，用「號」字，同大家收一收：人可以有名號，但不可只有空號。