https://e.pcloud.link/publink/show?code=kZmtDoZTTyLQIYyWDm3srM2WGRXe5hspqX7

官員平時對問題「裝聾作啞和稀泥」
出現問題就話「唔關我事」
呢種心態就官場「亞文化」
官員透過結黨營私、利益輸送
編織嚴密嘅「關係網」
將公權力私有化

潛規則係「不跑不送、降職停用
又跑又送、提拔重用」
笑罵由他笑罵，好官我自為之

「好官」意思係俸祿較好嘅官職
唔係良好官員

《新五代史‧伶官傳‧序》有云：
「禍患常積於忽微
而智勇多困於所溺。」

意思是：人生中嘅禍患
大多係由一啲細微事情嘅失誤
積累而釀成
智勇雙全嘅人
大多因過度沉溺迷戀
某啲人或事物不能自拔
令到佢陷入困境

歐陽修喺總結後唐莊宗李存勖
勵精圖治得到天下後
寵信伶人失天下嘅典型事例教訓嗰陣
作出以上具體論斷 :
國家盛衰、事業成敗
主要取決人事
取決當權嘅人思想同埋作風

當權嘅人將施政當作兒戲
將官員變戲子
最終只會步李存勖後塵
興教門之亂，被伶人點火焚屍

大埔宏福苑火災獨立委員會
一連四個月，開咗三十場聽證會

聽證會入面
好多部門代表承認「唔理想」

有啲官員講，程序可以改善
有啲講，資源有限

重點係，用字用得好藝術
「有不足」，但唔係「失職」

有部門承認無做風險巡查
解釋就係當時只係聚焦喺某啲項目
將來會檢討指引
加強培訓、加強協調

委員會揭示災難「完全可以避免」
多個部門災前敷衍應對投訴
災後推走自身責任

委員會總結已經定咗追責基調
報告預計喺十月下旬交上去

《易經》第七卦「地水師」
呢個卦講緊一件事：
一個社會、一座城市、一幢大廈
佢嘅安危，全繫於「制度」
呢道堤岸有無失守
堤岸在，水為利，堤岸崩，水為禍

宏福苑呢一場火
就係一場「水沖破堤岸」嘅災難

保護居民嘅每一道防線：
阻燃嘅棚網、走火樓梯
火警鐘、消防喉轆
政府嘅巡查監管
呢啲全部都係「堤岸」

委員會嘅專家一句話總結：
所有保障生命嘅措施，徹底失效

「地水師」初六爻
「師出以律，否臧凶。」

「律」就係紀律、法度、規矩
呢句嘢嘅意思係：
軍隊出征，一定要有紀律
無紀律，無論你係打贏定打輸
「否臧皆凶」，即係贏輸都凶

政府部門同委員會
都認同嘅六大促成大火因素
每一項，都係「失律」
紀律、規矩、法度嘅崩壞

第一，工人喺工地吸煙
起火源頭，就係未熄嘅煙頭
居民已經投訴過好多次
物管都向承建商反映過
承建商「宏業」置若罔聞，敷衍了事
從來無認真制止
呢個，就係「失律」

第二，用咗唔阻燃嘅棚網
專家講到明
如果當時用咗阻燃棚網
初期火勢好可能自己就熄咗
宏昌閣唔會全面起火
「宏業」嘅董事，明知故犯
指示分包商買可燃嘅網，去慳成本
呢個唔係疏忽，係蓄意失律

第三，用發泡膠封窗
發泡膠極度易燃
唔單止加速火勢、產生毒氣
仲遮住居民嘅視線
令佢哋遲咗發現火警

第四，用咗其他無阻燃性嘅建築物料
實驗證明帆布比棚網仲易燃

第五，喺走火樓梯每五層開「生口」
「生口」係為咗方便工人
出入外牆棚架
喺後樓梯嘅窗口位置擅自開咗一個窿
用木板或者鋁塑板遮住
本來密封嘅防火樓梯
變成咗一條「煙火通道」
濃煙同熱力經呢啲生口
直灌入本來應該係最安全嘅逃生梯
宏昌閣好多死者逃生嗰陣
發現兩條樓梯都無得用
被逼返入屋等救援，最後焗死喺屋企

第六，火警鐘失效
八幢大廈，有七幢嘅火警警報系統
被人為關閉
承辦商「中華發展」
自認係「橡皮圖章」
多次關閉消防栓同喉轆系統
從來無到過現場評估
無向消防處申報
物管公司「置邦」嘅無牌電工
應「宏業」指示，關閉咗消防總電掣
火警當日，全苑嘅消防警鐘形同虛設

六道防線，六次失律
每道防線崩塌嘅背後
唔係天災，而係人為

委員會首席代表大律師杜淦堃講：
工人吸煙、開生口、火警鐘被關嘅事
「避過監管」，就係咁樣
「令細細嘅局部火
變成史無前例嘅悲劇。」

聽證會第一日，杜淦堃問：
「各項缺失同失誤
點解承建商或者政府部門未察覺？」
「無部門覺得係自己責任。」

居民喺火警之前多次投訴火災隱患
消防處話：呢啲唔係我嘅職權範圍
係勞工處、屋宇署
房屋局獨立審查組嘅事
消防處收到投訴後
無轉介畀其他部門

房屋局獨立審查組 ICU
佢哋收到投訴點處理？

聽證會歸納咗四類回應
其中一類係「唔關我事」，唔處理
甚至叫投訴人「自己搵宏業」

喺聽證會作供嘅公務員
至少二十五人年薪過百萬
當中被批評卸責最甚嘅 ICU
兩位高級屋宇保養測量師
年薪超過一百五十萬
時任總監劉輔國，係首長級公務員
年薪超過二百三十萬

呢位劉先生，喺聽證會上至少八次
將問題歸咎於「制度」、「機制」
「制度問題因大火先特別顯現出嚟」

呢啲就係「權力嘅傲慢」
佢用「唔關我事」做護身符
用「制度問題」做免責金牌
用「按章工作」做遮羞布
佢坐擁高薪厚祿、坐擁法定權力
當人命懸於一線嘅時候
佢選擇「關人隱事」

委員會嘅書面陳詞指出：
「一個僅憑受監管者嘅一面之詞
就可以令佢失效嘅監管體系
絕非一個有效嘅監督制度。」

《孟子．離婁章句上》
孟子曰：
「今有仁心仁聞，而民不被其澤
不可法於後世者，不行先王之道也
故曰：徒善不足以為政
徒法不能以自行。」

白話文就係，孟子話：
「現在有具備仁愛之心
或有仁愛名聲的君王
百姓卻感受不到他的恩澤
也無法成為後世效法的對象
是因為沒有實施先王之道的緣故呀
所以說：只有仁心是不足以治理國家
只有治術也無法推行仁政。」

今次聽證會，揭露把關的部門
「徒法不能以自行」
成為「橡皮圖章」、「簽名機器」

消防裝置承辦商「中華發展」
董事親自承認自己係「橡皮圖章」

物管公司「置邦」嘅員工
喺授權票把關上面
一句供詞震驚全港：
「打個交叉我都當佢簽咗名。」

委員會用咗一個好精準嘅比喻：
呢三十場聽證會
好似一面「照妖鏡」
將香港樓宇大維修
監管制度嘅妖魔鬼怪
一隻一隻照返出嚟

多個團體、專業人士
原本係相互「監督」
實際上係相互勾結、相互包庇
令到成個監管機制失去作用

委員會書面陳詞明確裁定
出席聆訊嘅政府部門
房屋局獨立審查組（ICU）
屋宇署、消防處、勞工處
「給騙徒可乘之機」
對宏福苑慘劇，負有不可推御責任

呢個就係「地水師」六三爻
「師或輿尸，凶。」
軍隊可能滿載屍體而歸。點解？
因為「用人不當」
因為「號令不統一」
因為無一個真正有能力
有擔當嘅人喺度統籌
一支各懷鬼胎、各自為政嘅隊伍
注定失敗，注定「輿尸」而歸

一百六十八具遺體
就係呢場「制度之戰」嘅輿尸

「地水師」上六
爻辭係：「大君有命
開國承家，小人勿用。」

而家嘅刑事調查，已拘捕咗三十幾人
起訴咗七人同兩間公司
呢個係「執法」，係必須
但係「執法」唔等於「問責」

問責係要將「失律」、「卸責」
「尸位素餐」嘅人，一個個揪出嚟
尤其係嗰啲坐擁高薪、坐擁權力
但係喺關鍵時刻
選擇「關人隱事」嘅在上位者
更加重要嘅係「小人勿用」

「小人勿用」唔單止係對死者嘅交代
更加係對生者、對呢座城市
對「制度」呢道堤岸最後嘅守護