https://e.pcloud.link/publink/show?code=kZcqsiZFfDoJqCJD3zSd10AyS2oefUL44ok

各位，我問一個問題，入廟拜神許個願，係咪應該係想得到神明保佑？
定係你有嘢比求神明保佑更加急，但係要先畀香油錢，至可以使用？

2021年開始，嗇色園黃大仙祠正門保安更亭旁的廁所改為收費，每次兩蚊，可用八達通、支付寶畀錢，將兩蚊放入香油箱入面都得。

一米以下小童及六十五歲以上長者免費，就像是旅遊景點的優惠。

嗇色園黃大仙祠嘅理由係廁所使用量太高，大量旅行團與行山友以廁所作集合點，廁所負擔過重。

祠方自己講：「連洗手盆都見過黃金。」
總之係衛生情況出咗問題，祠方覺得要處理。

嗇色園黃大仙祠創立於1921年，源於1915年梁仁庵道長等，攜同黃大仙畫像來港，在各地區設壇供奉，最後定於蒲崗竹園村興建新祠。

黃大仙祠歷史悠久，香火鼎盛，附近的行政區自1969 年起命名為
黃大仙，反映這信俗在香港備受重視，對社區影響深遠。

2025年3月，國家文化和旅遊部公布第六批國家級非物質文化遺產代表性傳承人名單，其中就有黃大仙信俗傳承人李耀輝。

不過，「非遺」不是頒給黃大仙廁所的「非遺」，而是頒給黃大仙信俗「有求必應」。

李耀輝早年服務香港警隊，退休後以義工身份出任嗇色園黃大仙祠監院。
他坦言，三十多年警隊生涯煉就的嚴謹，讓自己的管理風格帶有鮮明紀律部隊烙印：嚴明、公正、杜絕腐敗。

黃大仙祠嘅管理層，部份來自「以結果為目標」嘅紀律部隊前成員，只要達成「結果」目標，其餘都不用考慮。

收費五年以來，都無人發聲，直至最近，有位女生喺小紅書發文，批評黃大仙祠廁所收費，話唔合理。
一石激起千重浪，網上即刻嘈翻。

有人撐祠方，話「私人地方，人哋有權收費，唔去咪唔去囉。」
有人撐女生，話「香火鼎盛嘅廟，使唔使咁？」

香港有七百六十九座公廁，元朗有一百七十一座，佔最多，北區有一百三十二座，排第二。
黃大仙區只有六座公廁，是最少一區。

黃大仙祠與其他宗教場所不同，因為係「有求必應」。

「有求必應」係黃大仙嘅金漆招牌，若不是「有求必應」，不會有這麼多信眾。
香港人、遊客、善信，係為「有求必應」呢四個字而嚟。
黃大仙係「有求必應」，唔係「有錢先應」，而且還是趁人有三急之際「有求不應」。

廁所收費，唔係收幾蚊嘅問題咩？而係拆咗黃大仙個金漆招牌。

一個遊客嚟黃大仙，拜完神，想去廁所，行到廁所門口見到個收費機，會點諗呢？

祠方相信唔會理個遊客點諗，佢哋嘅收費理由係「使用量過高」。

「使用量過高」正正代表有需求，香火鼎盛，善信多，旅行團多，行山友多，呢個係因為黃大仙祠「有求必應」，所以先至成為聚腳地。

「使用量過高」係因為設施較使用者少，收費當然可減少使用者，降低使用量。
黃大仙祠可以收入場費減少人流，人流減少，廁所使用量自然會降低。
但係，黃大仙祠只對使用廁所的人收費，這就是乘人之危，趁人有三急，「有求不應」、「有水放水，無水散水」。

呢個思維就好似一間食店，生意好到大排長龍，老闆話店內廁所要收費，食客減少後，就話「解決咗等位問題」。

黃大仙祠實施廁所收費五年後，根據收入估算，每周唔夠二百人使用，即係每日大概二十幾個人。

一間咁多香火、咁多遊客嘅黃大仙祠，廁所每日只有二十幾人用。

祠方可能覺得：「收費果然解決到問題。」

人有三急是必須解決的，由「使用量過高」到每日得二十幾人使用，嗰啲有「急需」嘅人，佢哋去咗邊？

黃大仙祠附近有黃大仙中心商場，商場有免費廁所。
原本在黃大仙祠集合人，為求「方便」，轉到商場集合。
原本想去黃大仙祠，因驚住人有三急要畀錢解決，不如穩穩陣陣行下商場、食吓嘢。

對長者嚟講，兩蚊可以搭巴士返屋企，對其他人嚟講，兩蚊只散銀，但用廁所要畀兩蚊，有被人㩒「水魚」嘅感覺，何來有求必應。

要解決廁所使用量過高問題，方法大致有兩個，一係減少「使用量」，二係增加「容納量」。

增加「容納量」需建更多廁所，要錢，以收費減少「使用量」，不但唔使花錢，還有收入，一日有二十幾人使用，都收返五十蚊，淨利潤。
不過，要派專人在閘口睇住有無人唔畀錢，呢條數唔知點計。

廁所收費唔係新鮮事，有好多國家同地方，公廁係要收費。

問題係， 人哋可以咁做，黃大仙祠就萬萬不可，因為係「有求必應」。

善信因「有求必應」去求黃大仙，係咪「有求必應」好難驗證，但係廁所要畀錢至可以用，係實實在在嘅「有求不應」，打黃大仙嘅臉。

為免黃人仙塊面被打腫，我有兩個建議：
一、索性封咗間廁所，從根源解決問題，每日雖然少咗五十蚊收入，但慳番以十倍計嘅清潔同管理費用。

二、增加廁所數量，人多時加設臨時廁所，做到「有求必應」，雖然要花錢，但相對保住「有求必應」金漆招牌，這些錢微不足道。
建立金漆招牌要幾代人努力，毀掉金漆招牌只需一個決定。

黃大仙祠不是無地方或無錢興建更多公廁，只要用於其他「面子工程」。

2023年5月7日，黃大仙祠增設三件工藝品，宣揚黃大仙信俗，包括全長23.4米、描繪黃大仙師得道成仙的金色浮雕的「大仙成道」長廊銅雕壁畫。
祠內首個黃大仙師金身雕像「大仙包容天下」，紀念香火延綿一個世紀的「百周年紀慶」紀念石。

做「面子工程」無可厚非，但解決三急問題更形逼切。

《莊子·知北遊》記戴，東郭子問於莊子曰：「所謂道，惡乎在？」
莊子曰：「無所不在。」
東郭子曰：「期而後可。」
莊子曰：「在螻蟻。」
曰：「何其下邪？」
曰：「在稊稗。」
曰：「何其愈下邪？」
曰：「在瓦甓。」
曰：「何其愈甚邪？」
曰：「在屎溺。」
東郭子不應。

翻譯成廣東話：東郭子請問莊子說：「您所說的道，究竟在哪裏呢？」

莊子說：「道是無所不在的。」

東郭子說：「請您明說吧，道到底在哪裏？」

莊子說：「道就在螻蟻身上。」

東郭子說：「怎麼會在這麼卑下的地方呢？」

莊子說：「道就在稊稗這種小草裏。」

東郭子說：「怎麼愈來愈卑下了呢？」

莊子說：「道就在磚瓦裏面。」

東郭子說：「怎麼又更卑下了呢？」

莊子說：「道就在屎溺裏面。」

東郭子愈聽愈迷糊，實在無話可說了。

莊子這才說：「你問的話，已經背離『道』的實質。以『道』來看萬物，不論是螻蟻、稊稗、磚瓦、屎溺……，本質都是一樣，沒有貴賤之分。不合乎『道』就不可能存在。既然已經存在，可見皆合乎『道』，所以我說『道』是無所不在的。」

道在屎溺，沒有屎溺，何來有道？

今日講呢啲，呢集係講唔可以趁人有三急「有求不應」。
呢個節目希望聽眾「有求必應」，記得訂閱、分享、留言，我哋下集見。