https://e.pcloud.link/publink/show?code=kZEh2iZ5N46ywoGkhmMkiU3VxWoH795XD57

醫管局與政府最近出嚟講，公營醫療收費改革初見成效，會確保無病人因為經濟原因，得唔到合適治療，好自豪咁講：放心啦，我哋為「貧、急、重、危」病人，做咗好多保障。

截至2026年3月底，當局批出超過 二十二萬宗醫療費用減免申請，係去年全年約一萬四千宗嘅十六倍。

佢哋話：「合資格受惠人士，由原本大約三十萬，增加到約一百四十萬，加埋綜援受助人、長者生活津貼嗰啲，合共大概二百萬人受惠。」

再睇申請醫療減免入息門檻，大致係咁：唔係淨係綜援、最底層先可以申請，正常打工仔、所謂中低收入家庭，都已經要納入「有需要」嗰班人，所以夾埋有二百萬人。

一個七百幾萬人口嘅城市，有成二百萬人，要靠醫療減免、安全網，
先至敢入醫院門口，呢件事係咪一個大大嘅警號？

醫療費用加咗後，原本「負擔得起」嘅病人，變咗無錢睇醫生，呢班人有成一百萬。

呢一百萬人，原本可以自費睇醫生，而家成為「合資格受惠人士」，政府喺醫療嘅收入係多咗，但因醫療派出去嘅錢，重更加多。

除增加醫療費用外，當局亦效法保險公司收「墊底費」，設立全年一萬元收費上限。
大部份香港人一年用公營醫療，費用都係幾百、幾千蚊，每年嘅醫療券金額都用唔晒。
「封頂」一萬，即係重有加價空間。

多病、重病、長期住院、頻密使用服務嘅病人，每年要付超過一萬元，才有醫療津貼。

講到公營醫療收費改革，避唔開一個名，就係醫務衞生局局長盧寵茂。

盧寵茂係外科權威，但管理唔係醫病，術業有專攻。

「術業有專攻」出自唐代韓愈的《師說》，意指每個人在學問、技術或業務上都有自己專門研究的領域，強調專才專用、互相學習。
原句為「聞道有先後，術業有專攻」，強調知識獲取有先後，專業技能各有擅長，不必過份強調長幼或輩份。

盧寵茂做局長前，係香港大學深圳醫院院長。

2016 年，盧寵茂接手做院長嗰陣，一邊承認醫院財政有壓力，一邊豪言話：「五年要追上瑪麗醫院八十年歷史。」

港大深圳醫院營運多年，累計欠咗港大校本部約六億「舊債」。
論欠債，瑪麗醫院八十年歷史都無欠咁多。

還款進度慢到飛起，幾年還唔夠二千萬，要同校務委員會講數，拉長分期，慢慢還。

由深圳返到香港，升呢做咗醫務衞生局局長，手上第一份大 project ，就係公營醫療收費改革。

盧寵茂有句說話好經典，佢為咗幫公營醫療加費護航，就話急症室終於「回復本意」救急扶危。

急症室收費調升至四百蚊，佢就話：你哋都負擔到，香港人好叻。

盧寵茂話，急症室加費後，「腳趾痕、攞病假紙、甩頭髮」嗰啲人，即係第五類非緊急病人，減少咗成三成。

第五類非緊急病人減少，未必係好事，病向淺中醫，若因為畀唔起四百蚊，以為自己係第五類非緊急病人，唔去醫院檢查吓，隨時會病情加重，甚至因而喪命。

屋企個細路撞到頭，阿媽成副身家都無四百蚊，唔敢帶個細路去睇急症，煮個雞蛋碌吓就算，萬一個細路係腦震蕩，就會因為急症室加咗價，一般市民唔知自己係咪第五類非緊急病人，因為無四百蚊，就無咗條命。
香港嘅人命價值，竟然低至四百蚊。

香港醫療費用唔係普通人可以承擔，北上求醫開始與北上消費看齊，求人不如求己，呢啲先至係香港人嘅叻。

當局既然會在深圳辦港大醫院，點解唔諗吓，將一啲長期住院，無即時危險嘅病人，轉到內地休養呢？

長期病患，不但病患辛苦，家人亦叫苦連天，經濟及精神上都飽受壓力。
公立醫院病牀長期不足，對長期病患來說亦唔係一個好嘅醫療環境，內地現有大量三甲醫院病人不足，無用武之地，正是不患寡而患不均。

香港病人過多，內地病牀空置，香港長期病患北上就醫，資源就不會錯配。

深圳港大醫院係三甲規格，港式管理，香港人門診打包收費，普通科一次二百蚊人仔，包診金同基本藥，住院牀位費比好多同級醫院低。

病患北上就醫，有好嘅醫療環境，心情開朗，病快啲好，又可幫醫院有多啲收入還債，唔使做老賴。

北上就醫當然要有配套，初期針對一啲長期病患、寧養、植物人等等。

由病人同家屬自願選擇，政府按病患每天所佔的醫療費用，一半給予北上就醫病人，扣除內地醫療費用，餘額歸病患所有。

香港公立醫院病牀，普通科病房，每日平均成本七千四百蚊，一半就係三千七百蚊。

另，家屬如要陪伴病人佔用牀位，每日一千二百蚊。

深圳港大醫院，Ａ級單人房及牀位費，對標香港私家醫院標準，酒店式管理，每日四百蚊人民幣。
套房牀位，比照香港瑪麗醫院私家病房，有個性化廚房、海景陽台，可選家人或專人陪護，每日二千四百蚊人民幣。

病患每日領三千七百蚊，若住Ａ級單人房及牀位費，每日餘額係三千三百蚊，住套房牀位，每日餘額係一千三百蚊。

這種做法，政府節省一半開支，又可騰出病牀及醫護人手，病患接受的醫療沒有降低，反而升高，更有餘額可自由運用，減輕經濟壓力，家屬甚至可全職照顧病患。

現在二十四小時通關的皇崗口岸一地兩檢，家屬放工後，可到醫院探望親人，甚至可留宿陪伴，這是金錢無法衡量的。

特區政府經常都話背靠祖國，但似乎想攞着數多啲，其實背靠祖國，要互惠互利，互通有無。

港人北上，就是背靠祖國嘅具體表現，唔使樣辦式嘅愛國教育，香港人與內地人在民間不自覺交流，就係最好嘅愛國教育。

香港病患在香港未能得到心目中的治療，北上就醫若能得到滿足，就是最好的愛國教育。

王sir在內地住咗超過十年，而家住大灣區，去醫院睇病同醫生傾吓偈，成為一種娛樂，喺香港，諗都唔好諗。

今日講呢啲，呢集係講香港有病無錢莫進來。
希望大家身體健康，下集見。