https://e.pcloud.link/publink/show?code=kZmUDiZs4OtKDeg4mBuB8o77KosLHVxMDd7

各位，我哋先講一個數字。

政府推咗一個計劃半年，有一千個名額，花咗納稅人近六十萬行政費。結果全港只有五個人報名。

唔係五百，唔係五十，係五個人。

我喺傳媒打滾幾十年，見過唔少政策出台畀人笑，但係六十萬換五個人，坦白講，呢種「效率」，我係第一次見。

六十萬行政費，除以五個人。即係每個報名者，政府使咗十二萬行政費去「吸引」佢。
十二萬，唔係津貼，係行政費。

《老子》有句話：「為學日益，為道日損。」

意思係，學問要積累，但治理之道，要懂得做減法。
呢個計劃，正正相反，配套做減法，行政費做加法。

講返正題。
香港政府去年十月推出「綜援長者入住廣東院舍試驗計劃」，每個月額外畀五千港元津貼，鼓勵長者北上養老。
一千個名額，關愛基金花咗近六十萬行政費，最終只有五位長者報名。

勞工及福利局局長孫玉菡，都要親口承認，數字同預期「有落差」。

有落差？
落差係你估一百，來咗八十，差咗兩成。
但係你估一千，來咗五個，呢個唔叫落差，呢個叫做政策根本性失敗。

點解會係咁？
因為政府由頭到尾，都係用「管理思維」諗問題，唔係用「長者思維」。

佢哋嘅邏輯好簡單，綜援長者要錢，院舍可以照顧人，我哋出錢送你入院舍，問題解決，落閘，收工。

呢種思維，係管倉庫嘅思維，唔係照顧人嘅思維。

長者真正怕乜嘢？唔係無錢，係無尊嚴。
唔係無地方住，係無自由。

一個七八十歲嘅老人家，喺香港住咗幾十年。
佢有街坊，有去開嘅茶樓，有老友記，家人係隔離住。

而家你叫佢搬去廣東省一間院舍，語言差異，飲食習慣唔同，文化背景唔一樣，仲要同一班陌生人住係一齊。
換係你，你去唔去？

你唔去，唔係因為你唔識好歹，係因為你係一個人，唔係一件貨。

唔想住院舍，無租屋支援？
當局嘅諗法，與在香港買護老院牀位無分別，五千港元津貼，唔係畀老人家，而係同院舍買位，所以無得自己租屋住。

問題仲唔止咁。
呢個計劃無任何配套，無醫療銜接，長者生病點算？
當局話院舍會提供醫療，但無講只係普通醫療，即係診所而唔係醫院。

政府以為畀錢就係德政，但係無配套嘅錢，係廢錢，落到行政費裏，六十萬就係咁消咗。

講到呢度，有人會話：「王SIR，你淨係識鬧，你有乜嘢建議？」

王SIR在內地居住超過十年，在大灣區居住三年，雖然無領綜援，但已有資格領長生津。
對於長者在內地的需求，王SIR有一定程度了解。

首先，點解一定要係院舍？
大灣區咁大，珠海、中山、惠州，環境好，生活節奏慢，消費低，讓長者自己喺大灣區租屋居住，唔係一樣可以養老？

當局要他們入位院舍，只為交差方便管理，把他們視為一件貨物，存入倉庫有人看守就了事。

長者大都抗拒入住院舍，原因有很多，失去自由是重點。

長者要自由，將他們困在院舍，非萬不得已，他們也不想去。

不是說院舍不好，而是自由太過可貴。

只要給長者自由選擇，不強逼入住院舍，相信綜援長者會樂於北上養老。

順帶一提，內地非常敬老，北上養老長者，隨時可得到幫助，不會孤立無援。

而家一個綜援長者，長生津大概四千至五千蚊，加上呢個計劃嘅五千蚊津貼，一個月就係接近萬蚊港元。

同一筆錢，喺唔同地方，買到嘅係截然不同嘅晚年。

一萬蚊喺香港做到乜嘢？
係用幾千蚊租一個劏房，係三餐節衣縮食，係唔捨得睇病，係每朝起身望住天花板諗今個月夠唔夠使。

一萬蚊喺大灣區又點呢？
2023-2024年大灣區平均月薪約九千一百元人民幣。

一萬蚊係大灣區平均月薪，可以租一個千呎有電梯單位，三餐出街食，仲有餘錢去旅行，有尊嚴地生活。

如果係兩老同行，兩個人加埋近兩萬港元，夠晒喺大灣區過中產生活，仲可以偶爾幫補子女。

呢個就係我哋要講嘅核心，香港赤貧戶，內地中產家。

同一筆錢，地點不同，命運不同。
孟子話：「有恆產者有恆心。」

人要有穩定嘅物質基礎，先有尊嚴，先有心情去好好生活。
呢個道理，幾千年前就講咗，但係政策制定者，好似無讀過。

光係錢唔夠，仲要有配套。我提四樣嘢。

第一，政府津貼探親交通費，唔好叫長者同家人自己孭。
讓北上養老長者的子女，每個月都有探親交通費津貼，在合理範圍內實報實銷，家庭關係唔會因此疏遠。
情感係最好嘅養老配套，唔係院舍牀位。

第二，協助長者申請內地長者優惠，包括免費乘車、入場優惠、醫療豁免等，減省日常開支。
政府只需要做好對接工作，唔需要動用公帑。

第三，做好醫療銜接，喺指定城市建立「港澳長者綠色通道」。用香港醫療福利覆蓋內地就醫，唔係叫長者自己頂硬上。

呢一點係最重要，長者最怕嘅係生病無依，有咗醫療保障，北上嘅心理障礙就少咗一大截。

廣州南沙中心醫院，已有特別為港澳同胞特設的醫護部門，有些三甲醫院，還可使用香港的醫療券，可見大灣區已積極配合北上養老。

大灣區亦可供香港人申請醫保，每年809.76元人民幣，北上養老長者可自費購買，唔使用公帑。

第四，做好法律保障。確保長者嘅資產、遺產、人身安全有保障，唔好畀人呃。
長者喺異地生活，法律係最後一道防線，呢道防線無咗，任何配套都係空話。

呢四樣嘢，唔係天馬行空，係基本功課，係當局推出計劃前，就應該做好嘅基本功課。

如果做得好，係多方得益嘅局面。

長者方面有尊嚴、有自由、有生活質素，安享晚年唔係夢。
唔係困喺劏房等死，係有豐足生活。

家人長期照顧老人係一個沉重壓力，北上養老後，長者生活改善，反而可以幫補子女，係一個反轉嘅局面。
長者由受助者，變成對家庭有貢獻嘅一份子。

香港政府可減省公屋壓力、減省綜援開支、減省醫療負擔。
五千蚊可以撬動嘅社會效益，係幾倍甚至幾十倍。
長期困擾香港嘅公屋老齡化問題，亦可間接得到紓緩。

成件事最大嘅輸家，係而家呢個無配套、無彈性、無諮詢過長者嘅方案本身。

北上養老計劃唔係唔啱，係唔夠膽諗，唔夠用心做，係政策上嘅懶。

領綜援嘅老人家，要求唔係好高，有個安靜嘅地方自由居住，有餘錢食好住好，有家人偶爾探望，有尊嚴走完人生最後一程。

政府要做嘅，唔係管佢哋去邊度、住乜嘢，係幫佢哋搭好條橋，跟住走開唔好擋路。

《論語》有句話：「仁者愛人。」
愛人唔係管人，唔係安排人，係真正去諗佢哋需要乜嘢，係尊重佢哋作為一個人嘅選擇同尊嚴。

一個社會點對待佢嘅老人，就係呢個社會嘅真實面目。
唔係睇你GDP幾高，唔係睇你高樓起幾多，係睇你嘅老人，係喺劏房裏面捱過最後嘅日子，定係有尊嚴安享晚年。

希望政府唔好問，點解咁好嘅計劃咁少人參加，而係去認真問，我哋嘅老人，究竟想要嘅係乜嘢？

今日講呢啲，呢集同大家講嘅係香港赤貧老，內地中產家。

我哋下一集再見。