https://e.pcloud.link/publink/show?code=kZOODiZpUUPr0BEDhfaAQdbDLLbqhg7iJkV

各位觀眾朋友，大家好，歡迎返嚟今集節目。

今日我想同大家講兩單新聞，一單喺河對面嘅深圳，一單就喺我哋自己嘅香港。
兩單新聞睇落好似無乜關係，一單係講一間細細間嘅街坊麵包店死過翻生，另一單就係講政府一個幾百億嘅融資擔保計劃爛帳爛到見底。

你將兩單新聞擺埋一齊睇，會發現一個好刺眼嘅對比。
同樣係政府同中小企之間嘅關係，深圳嗰邊係四十八小時救活一間蝕錢嘅麵包店；香港呢邊就係幾百億公帑變咗不法份子嘅提款機，最後條數落喺每個納稅人身上。

深圳係「上門同你解決困難」，香港係「幫你借到錢就算數」。
呢兩種態度，反映緊兩套完全唔同嘅治理邏輯。
今集就等我同大家慢慢拆解，亦都請各位諗吓，究竟點解會有呢種差別？

喺深圳鹽田區海山地鐵口附近，「麥穗山丘」麵包店，店主係吳旦枚。
2025年10月開張，主打高品質麵包，好多街坊都讚佢嘅出品好食。

不過，創業呢回事，有心唔等於有運。
吳女士第一次創業，經驗不足，舖位選址太隱蔽、產品線拉得太長、成本核算又唔全面。
結果，間舖由開張第一日起就持續蝕錢，捱咗半年終於頂唔住。

今年4月初，吳女士喺社群發咗一張閉店通知，話4月11日結業。
佢仲主動做咗一件事，就係同所有儲值會員講，你哋嘅儲值餘額，我一個仙都會退返畀你。
呢個動作，喺而家呢個時代，可以講係奇蹟。

通知一出，熟客唔捨得。
佢哋唔係等間店執笠搵日去打卡，而係喺社交媒體發帖挽留，少人接龍跟帖，成條街都響應。
事件喺網絡上發酵。

4月10日下午，「麥穗山丘」執笠前一日，鹽田區商務局嘅工作人員，無等吳女士求助，直接上門。
佢哋講嘅第一句係：「遇到咩困難呀？需要幫手嗎？」
吳女士當場眼濕濕 。

之後呢幾日發生咩事？
商務局嘅人幫佢梳理經營問題、提出調整建議、協助擴大銷路。網友同街坊繼續喺網上撐、喺現場撐。

由閉店通知出街，到決定重新開業，總共四十八小時。

4月14日一早，「麥穗山丘」重新開張。
早上六時四十分，舖頭門口已經排滿人。
七點開門，麵包一出爐就被搶光。
重新開業當日，預訂單超過五百張，所有產品全部售罄，連第二日嘅預售都訂滿晒。

吳女士接受訪問嘅時候講咗一句話，我覺得好值得記低：「呢度已經唔係一盤生意，而係一個傳遞愛嘅地方。」

一間細舖，三日之內由絕望到重生。
顧客、街坊、政府，三方合力，呢個就係深圳版嘅故事。

講完深圳，返嚟講香港。

香港政府都有幫中小企嘅計劃，規模大好多，叫做「中小企融資擔保計劃」，最出名嘅產品叫「百分百擔保特惠貸款」。

呢個計劃喺2020年疫情期間推出，最高貸款額九百萬港元，由政府百份百擔保中小企向銀行借貸。
意思即係，銀行借錢畀中小企，中小企如果還唔到，政府會還錢畀銀行。

理念上係好嘅，但係執行出咗咩事？

香港商務及經濟發展局最新披露嘅數字，截至2026年2月底：「百分百特別擔保產品」累計壞帳率高達19.3%，涉及金額 278億港元，壞帳宗數 13,231宗。

再加埋八成、九成擔保產品嘅壞帳，香港政府喺中小企擔保計劃上，累計壞帳高達三百四十八億港元，壞帳宗數超過一萬七千宗。

仲有更嚇人嘅。按證保險公司公布，3,919宗申請懷疑涉及違法行為，涉款約114億元。
其中2,259宗係喺貸款放咗出去之後，先至發現有問題，即係錢已經畀咗人，先知原來係呃嘅。

呃貸款嘅手法有幾離譜？
舉個例：2023年國安處起訴一宗案件，四個人合謀，虛構一間叫 Superfresh Nourishment 嘅公司，訛稱公司有員工、有薪金、有強積金供款，呃咗 473.4萬。

2024年12月，廉署起訴嘅「龍運汽車」案，一個四十五歲中小企東主，誇大員工人數同薪金，呃咗三百八十萬，最終判監三十八個月。
廉署透露，呢個行動一共起訴咗六名中小企東主，涉及詐騙金額合共一千九百萬。

2025年11月，廉署聯同警方再出手，一次過拘捕三十二人，涉及二十二間中小企，詐騙金額高達一億四千萬。
中介招攬店主、行賄銀行職員、提交假文件、之後分贓。

點解我話呢個計劃「融資擔保變咗無效」？
唔係話份合約喺法庭上被判無效，而係政策目的完全失效。
原本想救疫情下嘅中小企，結果錢走咗去不法份子口袋，或者走咗去根本唔應該借錢嘅人手上。

金融管理局承認，超過三成違約借款企業及擔保人面臨或已清盤破產。

日劇《半沢直樹》講嘅係一個銀行小職員，點樣幫瀕臨破產中小企做拯救方案，從而獲得銀行融資，重新振作。
做拯救方案，是重點，而不是濫批貸款，令中小企孭上巨債。

《半沢直樹》亦講銀行內部違法交易，有貸款就有枱低交易，天下烏鴉一樣黑，良心中小企，永遠是連餅碎都無得食的一群。

條數點埋？
評論人胡孟青講得好白：最終埋單嘅，係香港納稅人。

兩單新聞擺咗出嚟，我哋嚟做個對比。

第一個對比，係援助嘅姿態。

深圳鹽田區商務局係點樣做？
主動上門。
事情喺網上一發酵，政府唔使市民去請願，自己行上門問一句「你有咩困難」。

香港呢邊嘅百分百擔保係點樣？
坐喺辦公室等你申請，申請人交文件，銀行審批，按證保險公司覆核，政府擔保。
整個流程無人真正睇過申請企業嘅實況。
結果就係誇大人工無人查、虛構員工無人驗、甚至連公司有無真正營運都未必查得到。

第二個對比：援助嘅精準度。

鹽田嗰單，政府嘅介入係手術刀式，梳理經營問題、調整產品線、擴大銷路。
呢啲都係具體嘅經營輔導，唔係畀錢了事。

香港呢邊嘅擔保計劃係大水漫灌，一推出就最高九百萬、百份百擔保、還息不還本。錢係畀咗出去，但無人跟進間公司真係點樣運作。
結果壞帳率飆到19.3%，遠遠拋離其他八成、九成擔保產品嘅5-6%。

第三個對比：納稅人嘅風險承擔。

鹽田區政府幫「麥穗山丘」嗰啲支援，係顧問式、輔導式嘅，無動用大額公帑去補貼，主要係經營指導同宣傳協助，納稅人嘅風險近乎零。

香港呢邊，二千八百億嘅擔保額度，由納稅人兜底。
壞帳一個百分點就係二十八億。而家壞帳率已經去到19.3%，後果大家自己計。

第四個對比：社會動員嘅角色。

深圳嗰單，市民係參與者。網友發帖、街坊挽留、顧客排隊。
政府只係其中一環，社區嘅力量先係主角。
一間舖能唔能夠生存，最終靠市場嘅真實需求同社區嘅真實關係。

香港嗰個百份百擔保，市民係旁觀者兼埋單者。
你無份申請、無份參與，但你有份埋單，呢個就係最大嘅荒謬。

當然，我哋要公道講一句，深圳嘅故事係一間舖，香港嘅計劃係成個經濟體，規模同複雜度唔同。
但係核心嘅治理邏輯，係主動辨識問題，定係被動應對騙案？
係精準輔導，定係粗放放錢？
呢個就係我哋要諗嘅問題。

最後，我想留三個問題畀大家諗。

第一：一間舖死唔死得成，究竟係靠錢，定係靠人？
麥穗山丘重開嘅四十八小時，無人畀咗一分錢補貼畀佢，但成條街嘅人救咗佢。
真正救到中小企嘅，永遠唔係錢，係信任同連繫。

第二：政府應該用咩方式幫中小企？
係派錢擔保兜底，定係落場做教練？

香港政府喺疫情時畀咗二千八百億嘅擔保，但我哋有無問過，如果呢二千八百億有一半攞嚟做經營輔導、做中小企培訓、做社區支援網絡，結果會唔會唔同？

第三：而家擔保計劃壞帳率不斷升、違法個案不斷揭發，但無官員需要為呢個政策失誤負政治責任。
呢種無人埋單嘅問責真空，先係香港治理最大嘅隱憂。

深圳嗰間「麥穗山丘」，今日繼續開門。
香港嘅納稅人，就繼續為三百四十八億嘅爛帳埋單。

今集講呢啲，係講做生意如果係借錢頂落去，唔係審視經營問題，只會係孭重債收場。

如果覺得今集有啟發，記得like同subscribe，我哋下集見。