https://e.pcloud.link/publink/show?code=kZTgnV7Zp1N7QfQE1K47g8p9WVXnMbPzMUdk

有無見過一塊骨頭上面,刻住一把斧頭?

唔係裝飾,唔係畫公仔。
三千幾年前,商朝人將呢把斧頭刻喺龜甲同牛骨上面,當係一個字來用。

呢把斧,唔係劈柴嘅斧,係殺人嘅斧。
邊個揸住呢把斧,邊個就話得事,女戰神婦好揸住嘅,都係一把斧頭。

呢個字,今日我哋叫它做「王」。

「王」一開始唔係皇帝,甲骨文入面,只係一把斧頭嘅形狀。
斧頭喺上古唔係武器咁簡單,係禮器,係權威嘅象徵。
邊個握住把斧,邊個就係軍事領袖,可以決定邊個生、邊個死嘅人。

「王」這個字,由第一筆開始,就唔係講仁德,係講力量。

後來,字形慢慢變。
斧頭嘅形狀褪去,變成三條橫線,中間用一條直線連住。

漢代人董仲舒咁解釋:「古之造文者,三畫而連其中謂之王。三者,天、地、人也,而參通之者王也。」

孔子都有一句:「一貫三為王。」

三橫,代表天、地、人,中間一豎,打通三層。
意思係:能夠貫通天、地、人三者嘅人,就係王。

呢個解釋好靚,靚到好像「王」由一開始就係道德象徵。
留意返,董仲舒係漢代人,距離甲骨文已經成千年。
佢哋用當時嘅思想去重新解釋一個古老嘅字,斧頭變成三橫,拳頭變成道理。

《說文解字》咁樣定義:「天下所歸往也。」
天下人走去邊個度,邊個就係王。

注意係「歸往」,唔係「歸順」。
人係自願行過去嘅,唔係畀刀逼過去嘅。

歷史話畀我哋知,自願同被逼,好多時只係一線之差。

「王」字有兩個讀音,意思完全唔同。

讀「王」係名詞,君主、首領、最強嗰個。
香港人最熟悉嘅「王」,唔係秦始皇,唔係漢武帝。係「蛇王」。

「蛇王」唔係一條姓王嘅蛇,係指偷懶、匿埋唔做嘢嘅人。
返工嗰陣,有無見過一種同事,三點半準時消失,去茶餐廳坐一個鐘?
廣東話叫呢種行為做「蛇王」。

點解係「王」?因為他偷懶偷到出神入化,成為偷懶界嘅霸主。
呢個係香港打工仔嘅黑色幽默,真正嘅王,唔係坐喺龍椅上面嗰個,係成功避開老闆嗰個。

讀「旺」係動詞。
「王天下」,《孟子》入面講:「故王之不王,不為也,非不能也。」

前一個「王」係名詞,後一個「王」係動詞,讀「旺」,意思係「統治、稱王」。
孟子同齊宣王講:你唔去統治天下,唔係你做唔到,係你唔做。

同一個字,同一個寫法,讀音一轉,由「我係邊個」變成「我做乜嘢」。由身份變成行動。

香港人仲有一句:「無王管」,讀「枉」。
意思係無人監管、無法度、亂晒籠。呢度嘅「王」,唔係指皇帝,係指「王法」。
無王法就係無規矩。

你屋企個細路放暑假,日日凌晨三點瞓、下午三點起身,你會話:「呢個屋企而家無王管。」
個「王」唔係你,係你失咗蹤嘅權威。

講到呢度,要講一個好少人留意嘅轉折。

「王」字同「玉」字,喺古代係同一個字。
甲骨文同金文入面,好多時「王」同「玉」寫法一樣,或者極之接近。
《廣韻》講得清楚:「玉,說文本作王,隸加點以別王字。」
後來為咗區分,先至在「王」旁邊加一點,變成「玉」。

一塊玉石,同一把斧頭,最早嘅文字入面,係同一個符號。

玉係乜?玉係溫潤、係寶物、係君子佩帶嘅嘢。
斧係乜?斧係鋒利、係殺戮、係權力。

中國人後來將「王」同「玉」分開,係將暴力嘅一面收埋,將溫潤嘅一面拎出來做裝飾。
收埋咗把斧頭,唔代表佢唔存在。
故宮入面每一件玉璽,下面都壓住一堆無人提起嘅斧頭。

玉同斧拉上咗關係,嗰把玉斧叫做玉鉞,用玉鉞祭祀象徵吉祥,好多皇帝都鍾意造把細細嘅玉鉞,用嚟把玩。

你返工。老細開會,講到明「呢個 project 我話事」,你哋成 team 人點頭。
返到座位,你同隔籬位同事對望一眼,大家都知,真正「話事」嗰個,係個客。
老細只係一個讀「王」嘅人,個客先係讀「旺」嘅人。
名義上嘅王,同實際嘅王,從來都唔係同一個人。

你屋企阿媽話事,錢阿媽管,旅行阿媽話去邊就去邊。
你阿爸坐在沙發上面睇電視,好似一個被架空咗嘅君主。
有一日,雪櫃壞咗,阿媽唔識整,阿爸拎起螺絲批,十分鐘搞掂,嗰一刻,你阿爸讀「旺」。
權力唔係固定的,係按場景轉移,邊個解決到問題,邊個就係王。

你創業同兩個朋友夾份開舖,股份三三三剩一。
你以為三人平分,大家話事,點知其中一個朋友,每次開會都帶住一個「顧問」嚟。
個顧問無股份,無職位,每次佢開口,你個朋友就點頭。
你後來發現,個顧問先係真正嘅王。你以為嘅股權架構,只係一把放喺博物館裏面嘅斧頭。
真正嘅斧頭,收在枱底。

《易經·坤卦》有一句:「或從王事,無成有終。」
跟住王做事,唔好爭功,做好自己本份,結局自然會好。

呢句說話,兩千年來養活咗無數打工仔。
你唔係王,你係「從王事」嗰個。
唔好忘記,甲骨文嗰把斧頭,本來就唔係天生屬於邊個,邊個有力氣掄起佢,邊個就係王。
只不過後來,有人收埋斧頭,換咗三條線上去,同你講:呢個就係王,你要歸往佢。

你可以歸往,但要知歸往嘅,係三條線,定係一把斧頭。

《千字文》入面,「王」出現喺呢一句:「遐邇一體,率賓歸王。」
遠遠近近,全部歸向一個王。
下一句係:「鳴鳳在竹,白駒食場。」
鳳凰在竹林叫,白馬在草地食草。

呢個畫面好靚,但唔好唔記得,竹林裏面有鳳凰,草地上面有白馬,呢一切嘅背景,係一個「王」字。
個王係咪真係值得歸往,就要睇佢手上面揸住嘅,係一把斧頭,定係一塊玉。

發佈留言

About the Podcast

Welcome to The Houseplant Podcast, your ultimate guide to houseplants! Join us as we explore the wonders and importance of plants in our lives.

Explore the episodes

Latest posts