https://e.pcloud.link/publink/show?code=kZGMQoZQ9YX9HreLTuwTXFGqWatXQefHUnV
今日講「火」字
甲骨文嘅火字，好似一個山字
底部係一團火，三條火舌向上飊
《說文》：炎而上，象形，火，燬也
即係呢樣嘢好熱，天生就係向上
燃燒嗰陣發出光、熱、同破壞力
人類仲未出現，地球上已經有火
識得用火之後，人類文明先至開始
《千字文》：龍師火帝，鳥官人皇
「火帝」就係神農氏炎帝
佢教人用火耕種田
炎帝嘅文字記載
最早見於《左傳》
公元前541年
郯子訪問魯國時，舉出古代帝王
將炎帝列在黃帝後面，喺共工氏之前
以炎帝為火師，以火嚟作為官名
前486年，趙鞅占卜嗰陣
卜師史墨稱炎帝為火師
姜姓係佢嘅後裔
呢個記載入面，炎帝就火師
古人對火，係又鍾意又驚
火可以煮食、照明、取暖
一燒起上嚟，可以毀晒成個村
《尚書·盤庚上》：若火之燎於原
不可向邇，其猶可撲滅
即係火喺原野燃燒嗰陣
因為控制唔到，唔可以靠近
但最終都係有機會撲滅嘅
比喻小嘅過錯或微小嘅勢力
如果唔加以制止
會發展成難以收拾嘅巨大災難
後嚟演變為成語「星火燎原」
呢啲星星之火，好易焫㷫出火苗
喺客家話、粵語等方言入面叫做火屎
係木材燃燒後剩低嘅火炭或餘燼
粵語入面，火屎有兩個基本含義：
一是燃燒物濺出嘅火星
二是柴、炭等燃燒後嘅殘屑
㷫過火屎就係好易焫㷫
意思係畀人激到火都嚟埋
火都嚟埋就係怒火中燒嘅狀態
《左傳》記載：
凡火，人火曰火，天火曰災
將災火分為災、火、焚、爇
有嚴格嘅文字區分
焚指戰爭嘅火，爇係縱火
《周易·既濟》：
水在火上，既濟
君子以思患而預防之
意思係防患於未然（燃）
消防治理要列入國家管理重要內容
《墨子》論述防火技術同防火法令
成為早期消防技術規範嘅萌芽
春秋時期，《禮·少儀》規定
點火把嘅人，用左手舉火把嘅同時
右手仲要抱未點燃嘅木柴
乾木柴好容易燒完
必須有備用木柴隨時續火
仲要準備個大碗
隨時接住灰燼，唔畀火星落地
舉火把嘅人一定要坐嘅屋嘅角落
「不讓、不辭、不歌」
唔准同人打招呼
唔准講話，唔准唱歌
做到專心守職，心無旁騖
呢啲規定，目的都係防止發生火災
唐·溫庭筠《夜看牡丹》詩
高低深淺一欄紅，把火殷勤遶露叢
希逸近來成懶病，不能容易向春風
《韓非子·內儲說上》記載：
殷之法，棄灰於公道者斷其手
《春秋·魯桓公十四年》記載
（公元前698年）
秋，八月壬申，禦廩災
呢個係歷史上關於撲救火災
最早嘅完整記載
古代城市嘅望火樓，樓上有旗亭
發生火災嗰陣會擊鼓報警
用旗幟指明方向
《左傳·襄公九年》記載
（前564年）
是年春，宋國發生火災
樂喜任司城
一方面派伯氏管理街巷，封堵火路
加強巡視和守備
另一方面派華臣調集
「正徒」、「郊保」前往撲救
「正徒」係官役嘅固定役徒
「郊保」係守衛郊外小城堡嘅兵卒
呢個係完整記載
消防管理工作嘅狀況
《詩經·國風·豳風·七月》
七月流火，九月授衣
七月流火，八月萑葦
萑葦係兩種蘆類植物蒹葭
蒹長成後為萑，葭長成後為葦
「流火」嘅「火」係心宿二
即天蠍座α星，古稱「大火」
顓頊時期，設立「火正」呢個官職
專門負責觀測呢顆星
「流火」是大火星向西移動
預示天氣將由盛暑轉涼
需要準備添置秋冬衣服
祝融係第一位火正，火正亦稱為祝融
顓頊時期任命黎為火正
後裔世襲呢個職位
楚人先祖世代為火正，有祝融之稱
火頭係最先燒着嘅地方
火警發生後
搵到火頭先至知起火原因
唐宋嗰陣
火頭係寺院管廚房嘅一個職銜
而家叫做「伙頭」
廣州俗稱「伙頭」做「火爨」
煮飯叫做「開火爨」
《詩·小雅·楚茨》：
執爨踖踖，為俎孔碩，或燔或炙
用灶生火煮飯，所以叫做火爨
廚房必有爐灶，上古稱廚房為爨室
《紅樓夢》第五十三回提到炊爨
近日園中姐妹皆各在房中吃飯
炊爨飲食甚便
「分爨」以前指分家
「同居各爨」係未分家先分食
火腩係豬腰部份（三層肉）
經過醃製、燒烤後製成嘅燒臘
2010年，一名高登會員AirSupply
（高登會員編號：203207）
發表一篇關於火腩飯嘅食後評
將「男人的浪漫」描寫得淋漓盡致
被視為經典潮文
文章開頭
我每食完一碟火腩飯之後
都會同我女朋友講分手
因為我知道，佢已經唔再明白我
結尾係我覺得我係一個浪子
六道輪迴入面
以地獄、餓鬼、畜生三惡道受苦最烈
佛經多叫做「火坑」
被逼賣身成為妓女嘅人
形容為被賣落火坑
只許州官放火，不許百姓點燈
嚟自宋·陸游《老學庵筆記》：
古時常州每年元宵
按例大放花燈，以示歌舞昇平
田登作郡，自諱其名，觸者必怒
吏卒多被榜笞
於是舉州皆謂燈為火
上元放燈，許人入州治遊觀
吏人遂書榜揭於市曰：
本州依例放火三日
呢兩句話後嚟諷刺
在上位嘅人任意亂搞
限制在下位者嘅自由
而家叫做「雙標」（雙重標準）
駁火通常用喺警匪槍戰
高云覽 《小城春秋》第四十章：
你把槍帶到船上去吧
說不定海上會駁火
巴人 《莽秀才造反記》第五章：
他們一定以為對方是追來的官兵
相互駁火起來
駁火亦係煙民嘅動作
有啲煙民會一支接一支吸煙
用剛吸完嘅一支，點燃下一支香煙
亦有是用自己吸的香煙
為他人燃點香煙
火山係地表下
高溫岩漿同埋有關氣體、碎屑
喺星球地殼噴出形成
具有特殊形態嘅地質結構
火山唔係地球獨有
但已知嘅星球，仲未發現有活火山
火山孝子係形容沉迷風月場嘅人
銷金窩好似火山咁，可以熔咗啲金銀
孝子係定期奉上祭品嘅人
1966年
有「香港貓王」之稱嘅鄭君綿
演唱歌曲《火山孝子》
以詼諧方式描寫夜總會尋歡者形象
火山孝子而家用嚟形容
盲目氪金嘅遊戲玩家
盲目追捧品牌或向網紅課金的人
AI對火山孝子有另一啲解釋
話係喺考試或者學術壓力下
表現得非常出色嘅人
就好似火山爆發一樣
突然間爆發出巨大嘅能量同潛力
另一解釋係喺在父母面前極為孝順
在外人面前係截然唔同嘅人
火紅出圈係網路流行語
形容某人、某事物或某個地方
因為極受歡迎爆紅
名氣甚至超出原本圈子或粉絲群
被大眾廣泛熟知同埋喜愛
雖然因為話題性或行銷策略迅速走紅
但缺乏實質護城河或長期價值
導致熱度曇花一現
眼火爆係心入面極度憤怒
感覺雙眼都被氣得噴出火來
清朝末年文人何淡如
文筆頗佳，喜替人寫狀子訴訟
人稱「捉刀師爺」
與陳夢吉、劉華東、方唐鏡
並稱為「廣東四大狀師」
何淡如善作對聯
尤以粵語寫無情對著稱
其中一聯《題路人打架》：
一拳打出眼火，對面睇見崖广
粵語「崖广」，相當於「危險」
「广」本來並非「廣」的簡體字
本義是指棚舍
「崖广」是喺崖邊嘅棚舍
有危險嘅意思，粵音同「牙煙」
今集送大家一句
州官放火好崖广
火山孝子落火坑
發表迴響