https://e.pcloud.link/publink/show?code=kZp0HcZxt2o5YdLDyR0smu8sJGBw05kvkPy

今日由好多人都用過嘅「八折的士」講起。

「八折的士」（有時稱為「折扣黨」），開始於2002年，嗰時重未有智能手機，乘客不是透過的士台電召，而係用手機電召相熟的士司機，得到八折優惠，可以話係網約車雛型。

智能電話出現後，好多朋友以為，香港嘅網約車，係由Uber喺2014年7月21日嚟香港先開始。

事實係，早喺2013年，香港出現一批好有前瞻性嘅平台：HKTaxi、飛的（嗰啲 85 折的士 app）、GoGoVan、Lalamove……

佢哋做咩？就係用 app 幫乘客搵車、幫司機搵客，再用「八折、八五折」做賣點，已經係一個早期嘅「網約交通」生態。

嗰陣時，市民第一次體驗到，手機上睇住架車慢慢開過嚟。
司機唔使靠「兜下兜下」，而係 app 幫你派單。
乘客有優惠，司機都唔使再死守喺街邊等客。

你話呢啲係咪創新？梗係。
但係，喺法例上，唔好意思，當佢哋係賊。

點解？因為香港當時嘅制度好簡單：的士要「按錶收費」，任何折扣、任何 app 上面嘅「公司價」，一律被視為「兜客」、視為破壞按錶制度。

消委會出報告話「八折的士」有爭議。
政府部門出嚟講，司機透過 app 主動提供折扣，可能涉及違法。
好幾單乘客報警、司機被查，新聞成日用「折扣黨」呢個字。

結果係，呢班本來最熟香港路、最早肯試 app 技術嘅人，喺灰色地帶捱咗幾年，有人要停運，有人要賣身。

諷刺嘅係，當局最終話，「八折的士」收費低於咪錶，只要係由乘客提出，唔犯法。

回頭望吓，內地交通部2016年立咗法，網約車合法化，滴滴、高德一類平台喺監管框架下，愈做愈大，司機幾百萬、用戶幾億。

香港呢邊，嗰批八折先鋒，如果當年唔係被當賊打，而係畀一個清晰規管框架佢哋去試、去錯、去改，今日可能我哋講緊嘅，係「某某香港平台」點樣成為百億企業，而唔係被收購、被關服務。

時間跳到2025 年，立法會通過《道路交通（修訂）（網約車服務）條例》，政府形容，係一個「重要里程碑」，但政府只係見網約車不見電子地圖。

一萬部網約車投入市場，對的士必定係沉重打擊，尤其係長途客，會係網約車天下。

網約車規範化後，喺未來十年，邊個掌握AI電子地圖，邊個就掌握物流業，甚至係成個城市經濟嘅命脈。

香港成日講智慧城市、空間數據，但無諗過，重中之重係AI電子地圖。

唔好再犯1999年11月19日推出的「中原電子地圖」嗰種錯，明明快人一步，手上握住寶，結果只用嚟賣樓。

香港唔係無先機，中原電子地圖，當年就證明咗，香港人完全睇得出「地圖＋數據」係寶。

問題係，我哋只係用呢個寶，幫自己嗰一盤地產生意，無諗過將佢變成全城市都可以用嘅基建。

睇返國際上點玩電子地圖，就知道唔止係導航咁簡單，大到係國家安全層面。

而家網約車起步，物流業又受住電商、外賣、即日送壓力，政府手上有三維地圖、有空間數據平台，再唔係無條件。

今次如果再係「捉到鹿只係諗住賣樓」，十年之後，就唔好問點解又畀人哋平台壟斷、又係人哋話事，而香港，只係交租同交牌費。

今日講呢啲，講到呢度，希望第日可以攞住幅AI電子地圖做節目，順帶一提，王sir曾喺電台報過交通消息。