https://e.pcloud.link/publink/show?code=kZtLfiZvfrbpMYWdBhrDB4y2Khi04wmrK4X

請問有無聽眾，生日係二月二十九號？

普通人一年生一次日，你係四年先生一次，係天賦異稟，定係被世界欠咗你三年生日？

呢個問題背後，藏住一個幾千年都無完全解決嘅天文難題，地球繞太陽一圈，唔係剛好三百六十五日，而係三百六十五日零五個幾小時。

呢個「零五個幾小時」，就係今集主角「閏」字嘅靈魂所在。

我係王SIR，歡迎收睇《每集一字》。

今集，我哋從三千年前嘅甲骨文出發，跟住呢個「閏」字，一路行到現代，睇下古人係點樣用一個字，去記錄宇宙嘅餘數。

「閏」字係門字框，入面一個王。

好多人第一眼睇，以為係「王住喺門裏面」，係咪有啲奇怪？王係一國之主，點解要困係門入面？

要明白「閏」字，我哋要返去更早、更原始嘅版本甲骨文。

三千幾年前，商朝嘅卜者拿住龜甲、獸骨，用刀一刀一刀刻字。嗰個時代無印刷、無電腦，每個字都要用最直接、最精簡嘅方式去表達意思。

「閏」字嘅甲骨文係點寫？
好簡單，係「十三月」三個字！

大家細細諗諗：農曆一年係十二個月，有時多出一個月，就係「第十三個月」。
古人唔搞咁複雜，直接刻「十三月」，話畀你聽，今年多咗個月。

考古學家喺甲骨卜辭，例如合集四八五七號、二四九○四號等等，都直接睇到「十三月」呢個寫法。
呢個「十三月」，就係我哋今日所講嘅「閏月」。

當時嘅字，意思透明，直接了當，連細路都睇得明。

甲骨文係「十三月」，咁點解最後變成「閏」呢？

呢個就要講「文字演化嘅趣事」，字寫得快咗，就開始走樣。

到咗西周時期，金文（即係刻喺青銅器上嘅文字）嘅「閏」字，「月」字部份已經開始變形，由彎月形狀，變成三角形、再變成長方形。

去到春秋晚期，有件青銅器叫「王子午鼎」，上面嘅「月」字，開始有點像門框嘅形狀。

去到戰國晚期，有件文物叫「元年閏矛」，上面刻住「元年閏再十二月丙午」，「閏」字嘅形狀已經愈來愈接近而家嘅寫法。

即係話，個字係由「十三月」，經過幾百年嘅潦草書寫，慢慢訛變成豎筆加「月」，寫潦咗，變成「門」，下面嘅「三」，寫潦咗，變成「王」。

「門」加「王」，就係「閏」。

所以啊，「閏」字嘅「門」唔係真係門，「王」都唔係真係王，係「十三月」潦草書寫幾百年之後嘅「殘影」。

中文字形演變，有時候係呢樣嘢，原本嘅意思，藏喺歷史嘅褶皺，你要返去睇，先至明白係點回事。

文字走樣後，後人就要重新解釋佢點解係咁寫。

東漢時期，有個叫許慎嘅學者，花咗幾十年，寫出《說文解字》，係中國第一本系統性解釋漢字字源嘅書。

《說文解字》話：「餘分之月，五歲再閏。告朔之禮，天子居宗廟，閏月居門中。从王，在門中。」

意思係：閏月係多出嚟嘅月份，每五年會有兩次閏月。
平時，天子處理政務係喺宗廟（即係正式嘅地方），但閏月唔係正式嘅月份，無「中氣」，天子就唔住宗廟，改住係門中間嘅過渡地帶，唔做正式禮儀。

所以「閏」字「从王，在門中」，係天子住係門裏面嘅意思。

《周禮》亦都有記載：「閏月，王居門中，終月也。」

呢個故事，係咪好有畫面感？

想像一下，閏月嗰個月，整個皇宮嘅氣氛都唔同。
天子唔住係宏偉嘅宗廟，改住係門廊之間嘅小空間，象徵「呢個月係夾縫中、係過渡期、係多出嚟嗰一段」。

唔係升，亦唔係降，係「暫居」。

而家我哋知道，呢個「从王在門中」嘅說法，其實係對字形訛變之後嘅「重新詮釋」，係附會。

呢個故事解釋得好有文化意境，道出「閏」字最核心嘅感覺「閏」，係「多出嚟嗰一段，唔係主流，係餘數」。

難怪近年大企業老闆「着草走佬」叫做「閏」。

講完字源，我哋再深一層，去易經度。

《易經·繫辭上》有一段非常有名嘅文字，係關於大衍之數，即係用蓍草占卜嘅方法：「大衍之數五十，其用四十有九。分而為二以象兩，掛一以象三，揲之以四以象四時，歸奇於扐以象閏。五歲再閏，故再扐而後掛。」

呢段嘢，我幫大家翻譯一下。

占卜嘅時候，用五十根蓍草，實際上用四十九根。
將蓍草分做兩堆，象徵天地兩儀，每次揲（即係數）四根，象徵春夏秋冬四時。
最後每次會剩低一啲，叫做「歸奇於扐」，呢啲餘數，就象徵「閏」。

《繫辭》話：五年有兩次閏，所以要「再扐」，即係重複兩次計算餘數嘅動作。

呢段說話，表面係講占卜技術，但背後有個好深嘅哲學。
天地運行之間，永遠有「除唔盡嘅餘數」。

地球繞太陽，唔係剛好整數日，月球繞地球，又唔係剛好整數日，兩者湊埋一齊，更加對唔齊。

古人無電腦，佢哋觀天幾千年，發現，宇宙從來唔係完美嘅整數，宇宙係有餘數嘅。

「閏」，就係宇宙對人類說嘅話：「你算得幾靚，我都有多出嚟嗰啲。」

呢個「歸奇於扐以象閏」，係我最喜歡嘅易經句子之一。
佢唔係叫你逃避餘數，係話承認餘數，將佢收藏起來，積夠咗，再計一次。

我哋嚟到今集必說嘅《千字文》一句：閏餘成歲，律呂調陽。

《千字文》係南朝梁武帝時代，周興嗣用一千個不重複嘅漢字寫成，每句四字，朗朗上口，係古代蒙童嘅啟蒙讀本。

「閏餘成歲」：農曆每年，比太陽年大概少十一日左右。

十一日唔係一個月，但你積住，三年就係三十三日，差唔多湊夠一個月喇。

你再積，十九年就會積出七個閏月，農曆嘅十九年循環，對應太陽年嘅十九年，誤差細到可以忽略不計。

呢個叫做「十九年七閏法」，又叫「章法」，係古代中國天文學家，幾百年觀測同計算嘅成果。

而家我哋話「章法」亂晒大籠，就係講「十九年七閏法」，好易搞錯。

「閏餘成歲」係幾美嘅四個字。

餘數並唔係廢物，積聚起來，可以成就一整年。

「律呂調陽」：律呂係古代音律系統，六律（陽）六呂（陰），合共十二音，對應一年十二個月。
古人相信，音樂同宇宙節律有呼應，透過調音，可以令陰陽二氣和諧。

近年，科學家搵外星人，都係透過音樂去搵。

「閏餘成歲，律呂調陽」，將曆法同音律拉埋一齊，宇宙嘅節奏，係要靠「調整」維持嘅。

閏月係曆法嘅調整，律呂係音樂嘅調整。

世界係唔會自己剛好對齊，係要人去調整、去補充、去加上那多出嚟嘅一份，先能夠完整。

「閏」呢個字，除咗曆法外，仲有一個好有趣嘅引申義。

「閏位」係唔正統嗰個位置。

歷史上，如果有人「以下犯上」自立為帝，或者係喺改朝換代嘅過渡期間掌權，史書往往就會話佢係「閏位」、佢嘅朝代係「閏朝」。

意思係你唔係正統，你係多出嚟嗰個，你係夾縫裏面嘅過渡存在。

呢個「閏」字，由曆法嘅「多出之月」，延伸到政治上嘅「非正統」，一脈相承。

閏係邊緣嘅、係過渡嘅、係剩餘嘅，但「剩餘」唔係廢物，係歷史轉折嘅見證。

好多時，反而係呢啲「閏位」嘅年代，出現最多精彩嘅歷史故事。

講到「閏」，廣東同香港一個有趣嘅民俗，大家可能有聽過，就係「行閏月」。

廣東民間有個說法，逢農曆閏月，做仔女嘅要買一對鞋畀父母，叫做「行閏月」。

點解係鞋？
坊間解釋係，鞋係「行路」用嘅，閏月多出嚟，祝願父母健步如飛、長命百歲。

亦有一說，閏月係「餘月」，趁呢段「額外時間」，做多啲孝順嘅事，補返平時唔夠嘅關心。

仲有另一個民俗，「閏月不宜嫁娶」。

因為閏月係「多出嚟嗰個月」，唔係正正常常嘅月份，有人認為唔吉利，唔適宜辦婚事。

呢啲係民間傳說，唔係科學，但係反映出一個文化心理：「閏月係特別嘅、係多出嚟嘅，要特別對待。」

中國文化，從來都唔係只睇天文學數字，係要把天象同人嘅生活、情感連結埋一齊。

而家我哋用嘅公曆（陽曆），係另一套計算方法。

地球繞太陽一圈係三百六十五日零差不多六小時。

六小時積四年，差唔多係一日，所以每四年，二月加多一日，二月二十九號，就係閏日。

公曆閏年嘅規則係四年一閏，但係逢百年唔閏（因為四年六小時比一日少啲），逢四百年再閏（再作微調）。

呢個叫做「格里曆」嘅修正，係1582年，羅馬教皇格里高利十三世宣布採用，距今四百幾年。

農曆就係十九年七個閏月。

兩套曆法，用唔同嘅方法，處理同一件事，地球唔係剛好跑整數日子。

三千年前嘅商朝卜者，與四百年前嘅羅馬教皇，各自喺地球兩端，都係對住同一個宇宙問題：點樣處理嗰除唔盡嘅餘數？

我想同大家分享一個感想。
「閏」係餘數，係多出嚟嗰一份。

人生中好多最珍貴嘅時光，其實係「閏時光」，唔喺計劃中、唔係必要、係多出嚟嗰一段。

你同老友在路邊吃宵夜，聊到凌晨三點，唔係任何計劃表上面有嘅時間，這就是閏時光。

你放假在家，忽然拿起塵封多年的書本，讀了一個下午，這就是閏時光。

你跑完步，在公園長椅坐低，聽鳥聲發了十分鐘呆，這也是閏時光。

呢啲時間，表面上「多出嚟」、「唔係正經事」，但佢哋就好似農曆閏月咁，積夠咗，就令你整個人重新對齊。

《繫辭》話：「歸奇於扐以象閏。」
餘數係要收藏起來嘅。

你唔好覺得自己多出嚟嗰些時間係浪費，係喺度積住，等待成為你生命裏面最重要嘅調整。

今集「閏」字，我哋走咗一趟長旅：由三千年前甲骨文嘅「十三月」，到金文訛變成「門」同「王」。
由《說文解字》嘅「王居門中」，到易經嘅「歸奇於扐以象閏」。

由《千字文》嘅「閏餘成歲，律呂調陽」，到廣東民俗「行閏月」，再到現代嘅格里曆閏年，同埋呢個世界永遠解唔完嘅餘數問題。

「閏」字教我們，世界唔係完美嘅整數。宇宙有佢嘅餘數，人生有佢嘅餘數。

你唔需要逃避餘數，你要學識點樣將佢收藏、積累，然後在恰當時候，讓佢成就完整。

我係王SIR，感謝收睇《每集一字》。

如果今集有令你有所啟發，記得畀個掌聲、訂閱，同埋留言話我知：你生命裏面嘅「閏時光」係點？下集見。