https://e.pcloud.link/publink/show?code=kZHaKX7Z1bPmgdrks58NkxPDHtMClzvXY0iX

十月二十九號
香港有兩份文件，同一日出世
都係同大埔宏福苑
導致一百六十八人喪生嘅火災有關

一份係一千零一十三頁
宏福苑火災調查報告

另一份係區域法院一單審訊嘅記錄
被告七十二歲
因為講大埔宏福苑呢場火
已被收押咗十一個月
單案到而家仲未審完

先講十月二十九號下晝
特首李家超帶住七個司局長
企成一排，向全港市民鞠躬道歉

回歸以嚟，第一次有官員
因為災難集體道歉
亦係第一次有局長因為災難辭職

辭職嗰個，係房屋局局長何永賢
報告發表前一日，佢已向特首請辭
鞠躬嗰排人入面無佢

特首話：「雖然火災
不涉及房屋局局長個人犯錯
房屋局局長應承擔政治責任。」

個人無犯錯，但要承擔政治責任
大家可能會問：
被指負最大責任嘅房屋局審查組
工作守則係邊個寫㗎？

審查組係跟屋宇署嘅指引做嘢
無投訴就唔巡查
屋宇署有監督責任

屋宇署嘅政策局，係發展局

報告另外批評市建局嘅「招標妥」
話佢為制度本來要防範嘅人
「披上一層合法的外衣」

市建局又係邊個局管？
都係發展局

發展局局長甯漢豪點講？

佢話，「數月前
行政長官喺立法會問答大會上
比喻自己為一個船長
她亦以此為喻
若行政長官係船長
自己就係航行中嘅船員
作為船員需要依從船長指示。」

「我有思考過（辭職）
但係有陣時唔係一個
個人嘅意願嘅問題
而係我哋喺一個船嗰度
船長要求同埋指示
我作為團隊嘅一員呢
我係有責任呢去做好我嘅工作嘅。」

我做咗四十年傳媒
聽過好多比喻

甯局長如果係船員
何局長可能只係船上面打雜嗰個

決定邊個要落船
唔係邊個錯得多
而係邊個被逼到去船邊

保安局局長鄧炳強嘅講法
同甯局長差唔多
但係就升級到國家層面：
「我自己係唔重要嘅
最重要係特首作為政府首長
特首嘅指示我係要跟佢做
自己唔重要，係社會重要
香港重要、國家重要
（報告對）前線消防人員
致以高度肯定
讚揚佢哋展現極大英勇精神
甚至有救火人員
作出沉重代價及犧牲。」

會上有多名記者先後問到
三名局長認為自己
是否需要負政治責任
保安局局長鄧炳強
勞工及福利局局長孫玉菡
發展局局長甯漢豪均未有回答

李家超多次代為回應
強調自己作為行政長官係第一責任人
司局長須遵從行政長官決定
綜合考慮多項因素後
誰要問責「係我嘅個人政治決定」

喺大火中不幸喪母
兩名家傭離世的李國鴻直言：
「得一個人負責係無理由嘅！
咁其他嗰啲
係咪你哋政府覺得無事㗎呢？
點解唔去懲處佢
係咪一個局長嘅落台
就可以代表晒其他部門嘅出錯呢？
有啲要負責嘅唔使負責
可以逍遙法外。」

妻子喺大火中不幸罹難
宏泰閣居民葉家駒
認為李家超理應全盤接受報告內容
對所有部門責任同埋缺失無異議

報告明確指出四個部門、決策局
存在唔同程度疏忽
漏洞以至監管不力
涉事部門嘅局長都應落台

「如果剩係由房屋局局長
承擔呢個政治責任嘅話
係咪即係話房屋局
承擔埋其他決策局任何疏失？」

拒賣業權嘅宏盛閣何小姐表示
睇唔到政府誠意
何永賢離任純屬個人辭職
唔等同問責落台
事件唔應該因一個部門首長辭職
收購所有業權後「無咗件事」

2026年10月7日
《明報》專欄《聞風筆動》
李先知撰文
題為政圈吹風
宏福苑追責「刑不上局長」

近日有政界中人「吹風」
指現屆政府的任期只餘下半年有多
現階段不宜有司局長問責落台
換言之，宏福苑大火追究責任
將止於行政責任

全國港澳研究會顧問劉兆佳認為
今次宏福苑大火事件嚴重
涉及行政失當的部門眾多
放諸任何一個政府
「都好難話無政治責任」
他認為政府處理今次事件
應着眼於公平公正
重拾巿民的尊重及信任

「禮不下庶人，刑不上大夫。」

出自《禮記·曲禮上》
一般人嘅理解係
平民百姓唔配講禮
做官嘅犯錯唔使受刑

聽落好似特權階級嘅宣言
事實係啱啱相反

庶民階層終日為生計奔波
無閒暇同條件去做複雜嘅貴族禮儀
唔好以嚴苛禮制去要求或苛責佢哋
咁做唔係歧視或剝奪佢哋嘅權利
而係務實嘅豁免

《孔子家語》入面
冉有都問過孔子同一條問題：
大夫犯罪就唔使受刑？
平民做事就唔使講禮？

孔子話：唔係

大夫唔係唔使受罰
而係唔使綁住
拉去街市斬，當眾受辱

大夫犯咗大罪，聽到君命
就要「北面再拜，跪而自裁」

「刑不上大夫」原本嘅意思
係大夫要更加知恥
唔使人郁手，自己了斷

有一個細節千祈唔好漏
何永賢係「請辭」，唔係「被炒」

十月二十九號
何永賢發表離任聲明

行政長官已經接受
她為承擔政治責任而請辭
「過去四年多以來
能夠為香港這個
我深愛的城市付出努力
我深感榮幸，畢生感恩。」

何永賢點解會
「承擔政治責任而請辭」
我哋回顧下

宏福苑火災後
一千九百幾戶，無咗間屋
要賣業權，要重新揀樓
有業主要交六位數印花稅

何局長當時話
收購價高過市價三成
「嗰三成正正就係
情理法喺嗰個情嗰度」

災民要跟足程序
願意接受就彈性處理
唔願意接受唔排除立法

佢講原址重建要等到二〇三五年
問：「係咪呢八年
都要提供租金津貼呢？」

佢喺社交平台形容
交回收購信嘅數字「節節高升」
將「喪事」當做「喜事」辦
兩個幾鐘頭後，先刪咗呢四個字

有人質疑何永賢辭職後
仲有長俸收，唔算懲罰

公務員事務局局長楊何蓓茵回應：
問責官員無約滿酬金，無長俸
只係得強積金

何永賢一九九二年加入政府做建築師
做到建築署署長
屬於二〇〇〇年之前入職嘅公務員
可以享有傳統長俸

楊局長話，做公務員同做局長
係「兩份唔同嘅工」
今日份工唔應該影響上一份工嘅福利

同一日，十月二十九號
區域法院入面
原名黃覺岸嘅時事評論員王岸然
佢嘅案審到第十四日
控方完成盤問

案件押後到十一月二十號結案陳詞
王岸然繼續還押

簡單講吓王岸然單案

2025年年底
香港發生導致嚴重傷亡嘅
大埔宏福苑大火
時逢立法會換屆選舉
香港政務司副司長等官員
呼籲市民「從哀傷走到前進」
以選票選出有擔當嘅立法會
落實災後支援

宏福苑大火後幾日
王岸然原本打算參加
一個關於宏福苑嘅民間記者會
當日就畀國安處約談

之後佢喺YouTube
講咗約談嘅經過
被控妨害調查
成為《維護國家安全條例》
第八十八條嘅第一單案被告

控方指佢將火災同選舉掛鈎
「以災催票」

另外仲有一條
發布煽動刊物罪，涉及三十條影片

王岸然喺庭上就話
自己係「踩住紅線條邊嚟行」

同一場火：
報告寫到一千零一十三頁
其中四十幾頁
因為涉及刑事程序要刪走

有人因為講呢場火
被扣押唔准保釋
到報告公布嗰日
單案重未有審判結果