https://e.pcloud.link/publink/show?code=kZFqYcZqQFCEt3vVWY4WXmdlXL02b5goEck

上一集我哋講「果」，講到結果、收成。

今日接住落嚟，《千字文》下一個字「珍」。

「果珍李柰」，點解會用「珍」呢？「珍」又珍貴喺邊？

先睇字形，甲骨文的「㐱」係一個形聲字，讀音近「珍」，意思是被石料包裹，紋理細如髮絲的礦物。

左邊「王」是後來加上，代表玉石。

凡係同寶物、玉器有關嘅字，例如「珍」、「珠」、「瑤」、「瑰」，好多都係「王」字旁。

「珍」最原始嘅意思，就係珍貴嘅玉。

再引申，就變成珍寶、珍貴、稀有。

講到呢度，已經開始同《易經》拉上關係。

《易經》有一個好核心嘅觀念，物以稀為貴，但真正嘅「貴」，唔一定係物質。

《繫辭傳》講：「聖人之大寶曰位。」
意思係，最高嘅寶，唔係金銀珠寶，而係位置、責任、德行。

換句話講，「珍」可以係外在嘅寶物，但更高層次，係內在嘅價值。

再睇古文用法。

「珍」可以做名詞，例如「奇珍異寶」，即係罕見嘅寶物，亦可以做動詞，解作「珍惜」，例如「珍之重之」，即係好好重視。

仲有一個好常見嘅現代用法，「珍惜眼前人」，就係由呢個字一路演變落嚟。

返到《千字文》：「果珍李柰」。

呢度嘅「珍」，係形容詞珍貴。

意思係水果之中，以李子同柰子最為珍貴。

有趣嘅地方係，今日我哋睇，李子好普通，蘋果更加係日常到不得了。

點解古人會覺得佢「珍」？

原因好簡單，以前無冷鏈、無物流，某啲水果只喺特定地區、特定季節先有。

能夠食到，就已經係一種「珍」。

「珍」唔單止係物件本身，而係得來不易。

講到呢度，可以拉返去我哋現代生活。

而家香港，乜都有得買，車厘子、日本蜜瓜、韓國士多啤梨，一年四季都見到。

正正因為太容易得到，「珍」呢個感覺，反而淡咗。

廣東話都有講，「身在福中不知福」，就係唔識「珍」。

珍珠都無咁真：珍珠也作「真珠」，連珍珠也不及這事的真，即係千真萬確，非常真實。

禾稈冚珍珠：值錢的東西被不值錢的東西擋住，好東西沒被人發現，指人不可貌相。

珍饈係珍奇名貴食物，通常指風味特殊、製作精緻或食材罕見的高級佳餚。

人世間，最重要的是「珍重」。
《楚辭．王逸．遠遊章句序》：「是以君子珍重其志，而瑋其辭焉。」

唐．元稹《鶯鶯傳》：「臨紙嗚咽，情不能申，千萬珍重、珍重千萬。」

《紅樓夢》第十八回：「林黛玉見他如此珍重，帶在裏面，可知是怕人拿去之意。」

《今宵多珍重》是一首經典歌曲，國語原唱版在1956年面世，歌手為香港歌手崔萍，1982年再經香港歌手陳百強改編為粵語版。

1983年十大勁歌金曲頒獎典禮，獲十大勁歌金曲獎，AGB觀眾抽樣調查最受歡迎獎（該獎項為金曲金獎前身）。

日本經典勵志劇《阿信的故事》主題曲《信》，翁倩玉原唱、鄭國江填詞。歌詞點出人性中無奈的盲點：「誰會珍惜當你還擁有，將要逝去總想挽留」。

一句老套但好中肯嘅：「失去咗先識珍惜。」

再諗深一層，你覺得乜嘢係你生命入面嘅「珍」？

係錢？係時間？定係身邊嗰幾個真正關心你嘅人？

《易經》會話你聽，真正嘅珍，唔係你擁有幾多，而係你點樣看待你擁有嘅嘢。

唐・杜秋娘的《金縷衣》，是最著名的及時行樂與勸學之作。
「勸君莫惜金縷衣，勸君惜取少年時。花開堪折直須折，莫待無花空折枝。」

最後，用「珍」字，同大家留一句：
「珍惜才是最珍貴，莫待失去才追悔。」