https://e.pcloud.link/publink/show?code=kZAyWrZjwcs1YsLew5L8gflJjKhEf7GGpA7

立法會飲食界議員梁進喺5月6號提出動議，建議政府以「旅遊+飲食」為核心策略，帶動旅遊業發展。
署理文化體育及旅遊局局長劉震回應話，要透過美食吸引旅客來港，鞏固香港「美食之都」形象。

梁進話，香港有七間米芝蓮三星食肆，有足夠吸引力，米線同茶餐廳都值得推介。
佢建議加強向旅客推廣冰室、粵菜等本地特色飲食，喺各區推廣特色食肆，甚至要設專責部門同專屬基金統籌飲食業發展。

米芝蓮餐廳只係服務小眾客群，一般遊客反映「吃不飽又貴」、「味道好怪」。
你話推米芝蓮可以帶動旅遊？根本就係自欺欺人！

旅遊界議員江旻憓就話，要善用歷史古蹟、海濱長廊加入美食體驗，活化閒置公共空間。
漁農界議員陳博智就搬出「十五五」規劃，話飲食係文化載體，要配合「以文塑旅、以旅彰文」嘅戰略框架。

劉震話，旅發局會繼續辦香港美酒佳餚巡禮，仲推出「香港好味」名廚精選美食指南，邀請超過五十位本地名廚，推介全港十八區共二百五十間心水餐廳。
佢話要透過全方位宣傳策略，持續向世界推廣香港獨有嘅飲食文化。

我哋睇下數據，2026年五一黃金周，訪港內地客約九十八萬人次，消費模式係「打卡」而非消費。
台灣年輕人甚至直言香港被選為「最無聊旅遊地區」，除咗美食外其餘「跟台灣差不多」，五至十年內唔會再去。

值得一提係，同一場辯論入面，新民黨議員何敬康就講咗啲真話。
佢直言澳門食物「極度普通」，豬扒包、葡撻、牛雜、杏仁餅，「香港都有得吃」，甚至話「香港嘅豬扒包好食過澳門」。

何敬康嘅問題係，點解港人會專程去澳門食呢啲嘢？
佢歸因於「隔離飯香」心態，同埋澳門喺美食品牌化同旅遊推廣方面做得好。
呢個先至係問題關鍵，唔係香港無好嘢食，而係宣傳、包裝、性價比全面落後！

古人話：「民可使，由之；不可使，智之。」
旅遊係一種體驗，只需保持本身特色、稍加引導，就會令遊客有意到來。

但香港政府做緊咩？

華富邨神像山，三十年歷史嘅民間信仰景點，有八千尊神像，係港產片《智齒》取景地。
2026年5月初，康文署以「斜坡鞏固」為由直接剷平。一個充滿文化歷史價值嘅獨特景點就咁消失。

黃大仙公廁收費，宗教場所上廁所要收兩蚊，內地女生喺小紅書發文不滿：「黃大仙（祠）一年收那麼多香油錢，還要搞這樣的收費」。雖然可以理解祠方管理需要，但對遊客嚟講觀感極差。

特色街消失，雀仔街、玉器街、波鞋街、喜帖街、西港城，喺政府「催谷」同市區重建下失去原有特色。
喜帖街拆咗之後，謝安琪首《囍帖街》唱出港人心聲，但已經返唔到轉頭。

有近半世紀歷史嘅旅遊地標珍寶海鮮舫，2022年因營運成本高昂、無人承接而移離香港，拖船途中喺南海沉沒。政府未能提供合理支援，任由地標流失。

海洋公園入場人次從2012-2015年年均745萬跌至2016-2019年嘅570萬，跌幅超過兩成。
2024財年仲錄得7,160萬元虧損，連續第三年經營虧損。
立法會議員批評「經營不善就找政府幫忙」。

萬宜水庫東壩及破邊洲，原本係自然形成嘅隱世景點，因「小紅書效應」同政府配套不足而陷入混亂。
周末出現數百人候車長龍，黑的坐地起價劏客，垃圾亂拋、環境破壞問題嚴重。

政府點應對？增加小巴班次、用石屎擴闊萬宜路、設立人流管制站。業界憂慮「過度發展或令外島失去原有特色」，若變成另一個梅窩或南丫島，便有違原意。

正確嘅做法係咩？車輛要在距破邊洲三公里處為終點站，遊客要步行一小時才到破邊洲。

咁樣可以保護景點，車輛震動會導致落石。

三公里長道路可容納更多遊客，避免在終點擠塞，疏導人流。

要走三公里，令純打卡遊客卻步。

呢個先係「稍加引導」而非「刻意營造」嘅正確策略！

香港旅遊業面對嘅問題，唔係缺乏宣傳、唔係缺乏活動、唔係缺乏「旅遊+飲食」政策。

刻意營造破壞特色，神像山剷平、特色街消失、海鮮舫沉沒，景點不存遊客焉在？

正確嘅做法應該係保護現有特色景點，唔好亂拆亂建，改善大眾餐飲服務質素同性價比。

今日講呢啲，就講到呢度。多謝收睇。