https://e.pcloud.link/publink/show?code=kZ36siZao1R8EznUPYz7n87vetDHztIqSB7

各位，好。
今日王SIR唔講政治，唔講香港，講一個關於果樹的故事。

有一個人，親手在荒地種下一棵樹。

佢花了幾十年，選種、施肥、修枝，幾乎用盡一生。

樹長大了，結滿果實，果實甜美，全世界都搶着摘。

然後，種樹的人走了。

接手的人，好叻㗎，他把果實摘得更快、賣得更貴、分配得更有效率。

十五年過去，果實摘完一批又一批，數字靚到令股東笑到合唔攏嘴。

但係有一個問題，呢十五年，有無人種新的樹？

果樹的名字，叫 Apple，種樹的人，叫 Steve Jobs，摘果而唔種樹嘅人，叫 Tim Cook。

2026年4月20日，Cook 宣布9月退位，接班人叫特努斯( John Ternus)。

特努斯接到手的，係一棵果樹，係一棵十五年，不斷被摘果嘅果樹。

我哋先返轉頭，睇番 Jobs 種落咗乜嘢。

Jobs 話畀大家知，手機可以係一部電腦、一部相機、一個音樂播放器、一個通往整個互聯網的窗口。

呢個唔係改良，係重新定義。
係將一件你以為你已經明白嘅嘢，重頭再告訴你係乜嘢。

Jobs建立一個讓全世界開發者幫你建生態系統，然後抽你三成佣金的商業模式。
當時係史無前例，而家大家覺得理所當然，係因為 Jobs 已經將個概念植入咗你腦入面。

iPad，一個從前不存在的產品類別，一推出，全世界先發現原來自己需要一部平板電腦。
係Jobs令你知道你想要乜嘢，唔係你告訴佢你想要乜嘢。

Jobs唔係賣產品，係創造需求，係令一個從前不存在的市場，突然存在。

Jobs 係一個造雨的人，佢去的地方，自然下雨。

2011年，Jobs 走了，果粉都話isad。

Jobs留低俾 Tim Cook 的，係 iPhone、iPad、App Store、Mac 生態、iCloud 雛形，係一個足以讓公司可以永續嘅寶藏。

Jobs能夠被稱為蘋果教主，要先講一段大家可能唔熟的歷史。

1985年，Apple 董事會炒了 Jobs。

係，係炒魷魚，唔係佢自願走。

點解？因為佢「唔夠賺錢」。

當年 Apple 推出 Macintosh，銷量唔達標，公司虧損，董事會認為 Jobs 管理混亂、燒錢太多、產品賣唔好。

董事會請來一個「真正懂得做生意」的人，百事可樂前 CEO，斯庫利（John Sculley）。

斯庫利係乜嘢人？
佢係一流的職業經理人，懂得賺錢，懂得管理，懂得向股東交數，懂得壓縮成本、提升利潤率。

斯庫利接手後，Apple 繼續做電腦，繼續賺錢，繼續穩陣。

然後呢？慢慢枯萎。

1997年，Apple 市值跌剩大約三十億美元，帳上現金不足一億，距離破產只差九十日。

1997年，Jobs 回歸，帳上得返幾千萬。
佢第一件事唔係慳錢，係砍掉七成產品線，集中資源，做少數幾件事，每件都要改變世界。

然後係 iMac、iPod、iTunes、iPhone、iPad。

2011年 Jobs 離世，Apple 市值大約三千五百億美元。

由1997年30億，到2011年3,500億，係超過百倍。

從短期賺錢角度，Jobs 當年確係唔夠賺錢，炒佢有理。

從永續賺錢角度，Jobs 係令 Apple 永遠賺錢的人，炒佢係幾十年最大錯誤。

呢個，就係兩種 CEO 嘅分別。

短期賺錢型 CEO，榨盡現有資產，股東今日開心，十年後攤子榨乾，下一任接火棒。

永續賺錢型 CEO，不斷創造新資產，令不存在的東西出現，股東今日可能唔夠開心，但十年後感謝你。

Jobs係永續，斯庫利係割禾青。

Cook 呢？
Cook 係斯庫利的升級版，佢比斯庫利更聰明，割韭菜，公司盤數愈嚟愈靚，直至宣布退休前幾年。

2011年，Cook接手Apple，年收入1,278億美元。
2025年財政年度，接任十四年後，年收入4,356億美元，增長超過三倍，聽落好犀利。
相對Jobs用同樣時間，在瀕臨破產的開局下，年收入增長超過百倍，Cook望塵莫及。

2015年，iPhone 賣出二億三千一百萬部，2025年先以二億四千七百八十萬部打破紀錄。
十年時間，iPhone 銷量增長唔夠一成。

2011年，研發費用約二十四億，2025年財年升到約三百一十八億，升咗超過十倍，聽落好勁。

但係研發成果呢？錢花去邊？
花咗去 Apple Silicon 芯片、花咗去守住現有產品線。
無花去建立下一代 AI 基礎設施，無花去搶 AI 人才，無花去建大語言模型。

2024年，Google母公司 Alphabet研發費用接近四百九十六億美元，Meta 約四百八十三億，用錢去搶 AI 嘅未來。

Apple用咗三百一十八億，iPhone依然係教主時期的iPhone，可能還較差。

Cook選擇保住今日盈利，唔花錢在明日的競爭力。

9月接手的特努斯，佢要面對四個燙手山芋。

第一係AI 嚴重落後。

2022年，ChatGPT推出，全世界知道AI係未來。

2024年，Apple先慢慢推 Intelligence 。

2025年，Siri整咗十四年，宣布升級押後，到2026年2月仍然再度延遲。
CNET 報道話喺2026年底或更遲先有機會推出完整版。

三星的 Galaxy AI、Google 的 Gemini，人家已經跑到前面，Siri 仍在做內部測試。

ChatGPT 推出到 Siri 升級，有可能係四年距離。
在AI時代，四年係幾代人的事。

第二係Vision Pro 爛攤子。

2024年推出，一個頭戴顯示器賣3,499美元，折合港幣大約二萬七千蚊。
市場反應冷淡，Apple 隨即大幅削減生產訂單。

第三係iPhone 銷量天花板。

2025年較2015年，多賣170萬部，增長幾乎係零。

第四係中國市場兩頭受壓。

2024年，大中華區財政年度佔 Apple 整體收入約17%，生產線大部份在內地。
特朗普關稅戰，一邊賣唔入去，一邊搬唔走廠。
Apple兩頭受壓，進退兩難。

呢四個問題，都係 Cook 在位時埋下。
特努斯都要用佢的第一個任期去面對。

1985年，Apple 董事會炒咗 Jobs，因為佢「唔夠賺錢」。

結果，歷史裁決了Jobs 先係令 Apple 永續賺錢的人。

2026年，Cook 功成身退，留下四萬億美元市值，同時留下一個 AI 嚴重落後、iPhone 銷量十年近乎原地踏步、下一個爆款產品完全無影的公司。

果樹還在，果實卻是黃台之瓜，何堪再摘。

Jobs 種樹，Cook 摘果，果樹已經凋零， 特努斯還可以繼續摘嗎？

Apple 終會係下一個 Nokia。

今日講呢啲，呢集同大家講嘅係，賺大錢嘅 CEO，未必係好嘅CEO，令公司永續賺錢嘅 CEO，先係真正的 CEO。

我係王SIR，希望大家都能夠永續錢，我哋下一集再見。