https://e.pcloud.link/publink/show?code=kZMMUvZqglYDWf4xnuCWXfSckiisHYsQjX7

政府話，香港失業率3.8%，係過去三年嘅高水平。

但係同一時間，失業綜援個案，反而跌咗。

失業人數多咗，申領失業援助嘅人，少咗。
呢個世界，係咁運作㗎？

根據政府統計處，截至2026年2月，香港失業人數約13.4萬，失業率3.8%，連續維持係過去三年高位。

照道理，失業人愈多，要靠政府頂一頂嘅人，應該愈多。

社會福利署嘅數字係咁講：截至同月，失業綜援個案係15,169宗，只係整體失業人口嘅11%。

2024年失業率係3%，失業綜援係16,173宗。
而家失業率升咗成0.8個百分點，申請反而跌咗6.2%。

失業率上升，申領援助人數下降。呢個唔係奇蹟，係警號。

孫玉菡局長喺3月仲話，香港「整體勞工市場仍然穩健」。

王SIR問你一句：13.4萬人失業，只有11%有領綜援，其餘九成人係點過日子㗎？
係唔係有錢唔使做嘅，都叫失業？

錢鍾書《圍城》有句話：「城外的人想進去，城裏的人想出來。」

香港嘅失業綜援，就係一座圍城，特別嘅係，城裏的人想出來，城外嘅人唔想進去。
點解？聽一聽申領綜援條件，你就會白。

健全成年人資產上限，係三萬三千港元。
即係話，你手頭積蓄一旦超過三萬三，就算係剛失業、斗零收入都無、每個月仲要供款養家，政府都話唔關佢事。

十五至五十九歲嘅健全申領人，要參加「自力更生支援計劃」，每星期最少一次無償工作，每次最少一小時。

就算一切達標，成功入城，一個健全成年人單人申請，每個月領到幾多？約二千六百元。

對月入五六萬、突然無咗份工嘅中產嚟講，呢個唔係支援，係羞辱。

唔攞二千六百元，佢可以點？

燒積蓄。積蓄燒完，燒強積金。
強積金燒完，燒埋個人保險。
燒到山窮水盡、家徒四壁、資產歸零，終於夠資格入城，攞二千六百元援助。

中國古語有云：「亡羊補牢，未為遲也。」
出自《戰國策·楚策》，原文係「見兔而顧犬，未為晚也；亡羊而補牢，未為遲也。」

問題係，羊都跑晒，補牢有乜用？

高盛最新報告話，AI部署加速，2026年香港可能出現更多永久性裁員。
唔係因為公司蝕錢，係因為你整個崗位，被機器取代咗。
畢馬威調查更話，香港22%企業今年計劃減人手。

呢個唔係景氣問題，係結構性問題。
景氣差，等個cycle返嚟就有得做，結構性問題係，你嗰份工，永遠都唔繼續存在。

《貞觀政要》入面，唐太宗有句話：「居安思危，思則有備，有備無患。」

新加坡係一個向來「自助者天助」、連工運都唔鼓勵嘅城市。
2025年4月，正式推出Skills Future求職援助計劃。

條件係咁：非自願失業者、月入唔超過五千坡幣，可以喺六個月內，最多領六千坡幣補貼，大約折合三萬六千港元。

新加坡嘅設計唔係失業者，坐係屋企等錢落袋，係要積極搵工、參與培訓，累積「積分」先可以領款。

個計劃名叫「求職援助」，唔係「失業救濟」。
「求職援助」係幫你搵工，「失業救濟」係你要無咗份工。

2020年新冠疫情嗰陣，香港有政黨提出設立失業保障基金。
當年無做，理由係「唔鼓勵依賴」。六年過去，依然無做。

黃遠康議員喺《明報》提出方案：仿效新加坡，設計短期、限制申請次數（每三至五年一次）、上限係入息中位數40%嘅現金津貼。

2026年3月，香港入息中位數係28,600元，40%係11,440元。

王SIR唔係覺得唔好，但要講清楚：11,440元，對一個原來月入五六萬、每月支出四五萬嘅失業中產嚟講，係杯水車薪。
呢班人要嘅，唔係福利，唔係救濟，係一份可以維持生活尊嚴嘅工。

王SIR做咗幾十年傳媒，見過唔少社會動盪。

每次社會出大事，都唔係最底層先爆，係中產爆。

窮人係無產階級，有社會保障安全網，無乜嘢可以失去，慣咗逆來順受，只要唔逼到絕境，有糖食就歌功頌德。

中產係「由有變無」。
昨日有樓、有車、有積蓄、有退休計劃；今日失業，帳面負資產，積蓄倒計時，由奢入儉唔係問題，問題係眼睜睜睇住一切瓦解，卻無一個制度幫到手。

「曾經擁有」係最危險嘅情緒。

一個四十幾歲嘅中產，由月入五六萬，變成燒積蓄，變成負資產，變成無力供款，變成破產。
由失業開始嘅每一步，搵唔到工，政府幫唔到手，孤獨地沉淪落去。

呢班人唔會上街，唔會鬧事。
佢哋係默默地，對香港失去信心。

一個城市，除咗靠最底層撐住，亦要靠中產運作。
中產垮咗，城市無人運作，底層唔知點算，連那個「穩健勞工市場」，都係空話。

13.4萬人失業，九成人唔入城。

失業嘅中產，要嘅唔係二千六百元、唔係義工打卡，係有一個制度話佢聽：你唔係孤立無援。

呢個係人嘅基本尊嚴問題，唔係福利問題，唔係政治問題。

失業嘅中產，唔係數字，係人。
佢哋輸唔起呢一次，香港都輸唔起。

有效解決方法，唔係令到中產返貧入「綜援城」，而係營造良好就業環境，增加中產就業機會。

政府的再就業津貼試行計劃 (Re-employment Allowance Pilot Scheme)，是針對長期失業人士的現金獎勵計劃，旨在鼓勵重投全職或兼職市場。

對象係連續三個月或以上，沒有從事任何獲酬工作的四十歲或以上香港居民。
獎勵金額：連續完成六個月全職工作，最高一萬港元。
連續完成十二個月全職工作，再獲最高一萬港元（累計最高二萬元）。
兼職安排同樣適用，但津貼額會按工作時數相應調整。

問題是，如果能夠再就業，做番同以前差唔多嘅工，就唔使政府幫手啦。

再就業津貼試行計劃，目標對象相信不是中產，而是較基層的失業者。
當然，中產走向基層也可符合資格，雖說馬死落地行，但這是對社會有利的措施嗎？

2026至27年度，政府削減公務員編制2%，公務員整體編制將會下降至約十八萬八千個職位，初級公務員職位佔57%，中級是40%，高級職位佔3%。

吊詭的是，職位減少但仍然有空缺，而不是需要裁員。
截至2025年11月底，公務員實際員額約為 十七萬一千人，較減少後的編制，還少一萬七千人。

中級員工佔編制40%，通常指總薪級表（Master Pay Scale）第 10 點至 33 點職位。
月薪在二萬六千元（$25,815） 至 八萬元（$79,135 ）之間。

政府話招聘困難，點解唔諗吓推出「離職者就業計劃」，畀失業嘅中產一個再就業機會呢？

今日講呢啲，講嘅係公務員長期有大量職位空缺，中產失業搵唔到工做。
我係王SIR，下次再見。