https://e.pcloud.link/publink/show?code=kZ7P2V7Z969OkNkGHMmR9uFuB1jEl0Da2pJk

想象一下三千幾年前,一個主人企喺屋門口,望住遠方條路。
有人嚟緊,佢唔係普通路人,係帶住禮物、帶住敬意、帶住某種規矩行過嚟嘅人,主人企定定,等緊迎接。

甲骨文嗰個「賓」字,畫嘅就係呢一幕:屋頂之下,一個人行入嚟,有時仲加隻「止」腳仔,表示行緊入嚟嘅動作。
古人造字,唔係求其畫個客仔就算,佢畫嘅係「迎接」呢件事。
點解一個字要咁隆重?因為「賓」由第一筆開始,就唔係講緊「隨便嚟坐吓」,佢講緊嘅係一套人與人之間嘅規矩。

《說文解字》點講?「賓,所敬也。从貝,𡧍聲。」
所敬係值得尊敬嘅人,從貝,因為古時賓客上門,唔會兩手空空,帶住貝幣或者禮物,呢份禮唔係「手信」咁簡單,係一種承認同尊重嘅物質表達。
王國維講得直白:賓客嚟到,必有嘢送,送嘅動作就叫「賓」,所以個字從貝。

甲骨文嘅結構係無「貝」嘅,從「宀」從「人」,或者加「止」。
葉玉森解得好清楚:屋下面有個人,加隻腳,就係主人喺屋企迎接客人行入嚟嘅畫面。
個字本身已經係一齣微電影,門打開,人步入,主人企喺度。

「賓」嘅用途,隨住時間一路擴張,最初係屋企門口嘅事,後來變成朝廷嘅事。

《易經·觀卦》講:「利用賓于王。」
呢度嘅「賓」已經唔係普通做客,係以賓客之禮去見君王。

再進一步,《道德經》講:「侯王若能守之,萬物將自賓。」
萬物自己嚟歸順、嚟服從。

由「我迎接你」變成「你自動過嚟」,個權力方向調轉咗,有趣嘅係,用嘅仍然係同一個字。
中國人嘅政治想象裏面,歸順唔係純粹嘅壓服,佢被包裝成一種「賓」嘅關係。
你嚟,我以禮相待,你敬我,我亦敬你。

《論語·公冶長》有一句好實在:「赤也,束帶立於朝,可使與賓客言也。」
孔子講公西華,着好晒官服企喺朝廷,負責同賓客交談。
呢度嘅「賓客」係外交場合嘅人,要有人專門應對。
孔子無話佢仁,只係話佢勝任呢個位。
可見「賓」喺春秋時代已經係一門專業,要識得點樣接待、點樣講嘢、點樣企。

《千字文》入面嗰句:「遐邇一體,率賓歸王。」
遠近都融為一體,四方都率領住嚟歸順君王。
呢度嘅「賓」係動詞化嘅服從,但底色仍然係嗰個門口迎接嘅畫面,只不過門口變得極大,係整個天下。

《莊子·徐無鬼》有一句:「先生居山林,食茅栗,厭蔥韭,以賓寡人。」
呢度嘅「賓」解作擯棄,即係遠離我、唔好理我。
同一個字,一邊係「我好敬你,請入嚟」,一邊係「我唔要你,出去」。

呢個轉折點好關鍵,賓客同被擯棄嘅人,喺字形上係同一副面孔。
分別在於,你有無帶住嗰份「敬」入嚟。
帶住,你係賓,無帶住,或者主人唔接受,你就係被擯嘅嗰個。

我哋今日講「貴賓」、「嘉賓」,個「貴」同「嘉」係後來加上去嘅修飾,「賓」本身已經包含咗尊敬。
問題係,尊敬係雙向嘅。甲骨文畫嘅係主人迎接,但主人點解要迎接?
因為嚟嗰個人值得。
如果嚟嗰個唔值得呢?個字無畫嗰一幕。

《道德經》講「萬物將自賓」,聽落好理想。
現實入面,邊個定義邊個值得被迎接、邊個值得被推開?
呢個問題,三千年前企喺門口嗰個主人,同今日坐喺寫字樓見客嗰個香港人,面對緊係同一件事。

你見工,踏入會議室,對方起身握手,叫你「坐吖,飲唔飲水?」
呢個係賓,你係客人,佢以禮相待。

試用期完咗,公司話唔啱,你執嘢走,由頭到尾你都係同一個人,但由「賓」變成「擯」。
門口無變,變嘅係對方仲需唔需要你。

過年親戚上門,阿媽一早買定雞、蒸定糕,門口迎接。呢個係最傳統嘅「賓」,帶住禮物嚟,帶住敬意走。

如果有個親戚年年嚟都係數你份工、數你層樓、數你個仔成績,你仲迎唔迎?你面上笑,心入面想擯。
同一個字,一餐飯入面同時發生。

曖昧階段,對方上你屋企,你特登執好間房,買定佢鍾意飲嘅嘢。佢係「賓」。
有一日你去佢屋企嘅時候,佢都係用同一個標準執屋。
你由「主人」變成「賓客」嘅時候,個規矩無變,但位置變咗。
邊個係「主」,邊個係「賓」,有時唔係咁清楚。

香港人講「賓至如歸」,就係客人嚟到好似返屋企咁。
香港仲有一個好地道嘅講法:「賓虛噉嘅場面」。
嚟自 1959年美國電影《賓虛》,套戲動用幾萬個臨時演員,香港人後來用「賓虛」形容墟冚到爆嘅場面。
呢個「賓」同甲骨文嗰個「賓」已經好遠,有趣嘅係,佢仍然係關於「好多人聚集喺一個地方」,只不過甲骨文嗰個門口好細,賓虛嗰個場地好大。

仲有「禮賓府」。香港行政長官嘅官邸,前身係總督府,用嚟接待來賓、舉行官方活動。
呢個係「賓」字最制度性嘅用法,邊個可以入禮賓府、用咩規格接待、企喺邊個位置,全部有規矩。
甲骨文嗰個主人企喺門口,禮賓府嗰個門口,本質上做緊同一件事。

「賓」字話畀我哋知,人與人之間,永遠有一個門口,你企喺門口,可以選擇開門定閂門。
但要記得,你今日開門迎嘅人,聽日可能係你被擯嘅時候,企喺外面望入嚟嗰個。

發佈留言

About the Podcast

Welcome to The Houseplant Podcast, your ultimate guide to houseplants! Join us as we explore the wonders and importance of plants in our lives.

Explore the episodes

Latest posts