https://e.pcloud.link/publink/show?code=kZ3XIX7ZLR9bO9NagiQ917liImKlmyni7XJ7

行過佐敦彌敦道
有一間舖你一定見過
閘落咗十八年
招牌拆咗十一年
個位就咁擺喺度
離港鐵站一兩分鐘
人流多到逼爆

呢間舖喺彌敦道三一零至三一二號
前身係泰林電器旗艦店

2026年11月2日
圍板貼咗張鮮橙色招紙
寫住「點心客棧」
市場消息話
三一二號單邊地舖
一千六百幾呎
月租十二萬租咗出去

今日同大家講三樣嘢
第一，泰林當年點威
第二，泰林點解會執
第三，個舖點解丟空十八年

再同大家睇睇
香港仲有邊啲舖
同佢一樣咁「長命」

先講泰林當年點威
泰林全名叫泰林無線電行
一九四六年由林球創辦
即係二戰啱啱打完
香港百廢待興嗰陣

一開始做修理同埋買賣收音機
口號係八個字
「薄利多銷，服務至上」

一九五七年，泰林首先將立體聲
即係當年講嘅「身歷聲」
音響器材帶入香港
嗰個年代
屋企有部靚音響係身份象徵

六十年代香港人口爆炸
泰林就由音響擴展到電視、雪櫃
洗衣機、冷氣機、相機
慢慢變成連鎖店

一九七七年
泰林做咗一樣好有前瞻性嘅嘢
香港買電器，喺內地取貨
嗰陣時好多香港人返鄉下
都想帶部電視返去
泰林就幫你搞掂
可以話係今日速遞嘅先軀

八九十年代係泰林嘅黃金時代
一九八九年淨係裝修總行
就使咗五百萬
嗰陣五百萬真係好大筆錢

一九九七年高峰
全港有十三間分店
員工多達四百人

八九十年代彌敦道霓虹招牌林立
泰林嗰幅黃色大字
係好多香港人嘅集體回憶

二零零六年泰林慶祝六十周年
仲想年輕化
時代廣場分店翻新
用晒黃橙綠色
又喺國金開兩間分店
仲搞埋副品牌 Cube
請過關心妍、吳卓羲
胡杏兒、黃宗澤代言
吳卓羲嗰句
「泰林 My favourite」
有啲觀眾可能仲記得

慶祝完六十周年
兩年之後，泰林就無咗

二零零八年十月十七號
泰林全線十三間分店
下晝突然落閘
二百六十個員工即時失業
欠債大約一億

表面原因好簡單
金融海嘯銀行收緊銀根，周轉唔到

泰林老闆林作禮
當晚喺總店講咗幾句說話
佢話近年租金高企
簽咗唔少甲級商場租約
薄利多銷行唔通

甲級商場即係國金、時代廣場呢啲
泰林六十周年想轉型
走入貴價商場
租金係固定成本
生意好唔好都要交

報道引述消息講
租金係泰林經營成本最大嘅一份
業界人士亦講過
西洋菜街一個舖
三年之內
月租由五十萬升到一百萬

賣電器本身已經係薄利
新派影音店鬥平又大送禮品
請明星拍廣告
租金就年年加
利潤夾喺中間點會唔扁

海嘯之前已經有警號
有供應商話
二零零七年開始
泰林已經拖數
行內一般九十日找數
泰林拖到四五個月

林作禮話
過去三年自己掏咗七千萬出嚟救亡
最後都係救唔返

執笠後
清盤人搞過兩日半價清貨
市民排長龍去搶
兩日套現四百七十萬
用嚟先找員工人工
二零零九年三月
高等法院正式頒令清盤

有一班員工更慘
佢哋被列為「自僱人士」
勞工處話幫唔到
連補償都攞唔到

泰林點解會執？
金融海嘯係最後一根稻草
真正拖垮佢嘅係高租金
係轉型走錯咗方向
係舊式經營追唔上新對手

彌敦道個巨舖，係自置物業
點解丟空十八年？

呢間舖一直係林家擁有
業權一分為三
長子林作為一份
母親一份
幼子林作禮一份

問題就出喺
長子林作為身上

林作為係泰林第二代掌舵人
九十年代中風
離開咗管理層
後尾財政出事
向阿媽同細佬提議
賣咗啲物業，但係被拒絕
二零零三年法庭頒令佢破產

佢嘅感情關係都好複雜
一九九四年同太太蔡惠英辦離婚
法庭判佢要畀三千九百萬贍養費
佢淨係畀咗一千萬左右
離婚手續一直未完成
另一邊廂佢同同居女友譚雪梅
生咗三個仔女

二零零五年十一月
林作為喺護老院過身
留低咗三份遺囑

一九八七年嗰份
遺產留畀太太同兩個仔
一九九九年嗰份
遺產留畀同居女友
律師樓之後唔見咗九九年嗰份

二零零五年，律師去護老院
搵林作為再簽過一份，內容一樣

法庭判詞提到
二零零五年嗰陣
林作為已經「出唔到聲
只係識郁隻手同用眼神」

大房一方入稟
官司打到二零二零年
高等法院裁定
一九八七年嗰份
先係唯一有效遺囑

九九年同零五年嗰兩份
因為林作為無訂立遺囑嘅能力
全部無效
二億幾遺產歸太太同兩個仔
女友一方之後再上訴

留意呢條時間線
二零零五年，林作為走咗
二零零八年公司執咗
二零二零年先有判決
之後仲有上訴

一個舖三份業權
其中一份卡喺一場打咗十幾年
嘅遺產官司入面
租出去要三個業主同意
賣或者大裝修
都要三個業主同意
傾唔掂就只可以擺喺度

擺喺度都有使費
二零一八年
差餉物業估價署入稟高院
追討欠款同差餉超過二百萬
個舖丟空，政府照收差餉

招牌都係咁
執咗笠後無人理
日曬雨淋七年變成安全隱患
二零一五年
屋宇署安排承建商拆咗佢

二零一九年六月
物業推出標售，市值大約六億

法庭文件後來披露
二零二零年底
「舖王」鄧成波
出價二億五千二百萬購買
之後交易告吹

二零二一年
高等法院應林作禮申請批准出售

去年，資深投資者郭應龍
用四千八百萬買咗三份二業權
包括三一零號全幢
同三一二號地舖連一樓

三份二業權四千八百萬
成個買大約七千二百萬
同二零一九年六億嘅市值比
跌咗接近九成

點解咁平？
因為有三個「蝦碌」
第一，淨係三份二業權
餘下三份一仲喺林家手上
第二，遺產爭議未完
第三，舖入面要大清拆

中原工商舖嘅潘志明入過去睇
佢話入面成棚加固工字鐵
密密麻麻
「好似行入一間兵工廠」
上上下下仲有舊式閣樓
淨係清拆同重整結構
隨時要幾百萬

郭應龍點解敢接？
佢係美聯前執行董事
專揀人哋嫌麻煩嘅盤

佢最後同林家後人達成共識
一齊出租
佢自己講得好淡定
「與對方有共同利益
商量好就向前行」

呢句說話就係成件事嘅答案

十八年嚟個舖唔係租唔出
唔係無人要
而係無人肯同對方坐低傾
有共同利益就向前行
無共同利益，就一齊攬住個吉舖

粗略計條數
今日業主三份加埋叫租
大約四十四萬一個月
就算打個折當三十萬一個月計
十八年都超過六千萬

即係話，一場家族爭拗
蝕咗嘅租金已經多過
郭應龍買三份二業權嗰四千八百萬

講完泰林
香港仲有無其他丟空好多年嘅舖？
有，而且原因各有不同

第一個，政府嘅旺角街市

二零一零年三月一號
旺角街市關門，之後一直空置

二零一二年
城規會改劃做商業用途，預備賣地
地產建設商會就旺角分區大綱圖
高度同通風限制提出司法覆核

二零一三年
塊地被剔出賣地表

二零一五年，政府官司輸咗
同年區議會想做臨時用途
政府話無部門有意用

一直拖到二零二零年
先交畀市建局
翻新做地區康健中心
二零二五年十月
油尖旺地區康健中心
正式投入服務

旺角街市由關門到重開
用咗成十五年

泰林係私人爭產
旺角街市就係規劃、官司、部門
互相推來推去
私人業主唔齊口
政府部門都一樣唔齊口

新樓商場都會丟空
講嘅係深水埗愛海頌

愛海頌係長實同市建局合作發展
二零二一年入伙
基座商場三十八個舖共五萬一千呎
入伙到而家，一直丟空五年

最近成籃子舖位連車位
以近一億八千萬沽出
扣埋車位
商場實際呎價唔夠三千蚊
樓上住宅近期平均呎價
大約一萬五千二百蚊

即係話樓下商場每呎
只係樓上單位大約五份一

一個新樓盤
樓上單位早就賣晒
樓下商場就吉晒
呎價仲平過住宅

銅鑼灣利園山道一個地舖
係自由行年代嘅後遺症

二零一七年有報道講
莎莎喺利園山道
十五同十七號嘅地舖
二零一一年，月租九十五萬
二零一三年，續租加到一百零五萬

二零一五年，自由行退潮
莎莎唔續租，個舖丟空兩年
業主一劈再劈
叫租比舊租跌咗接近六成都仲未租出

本土研究社最近發現
市區至少有十七幅私人土地
丟空接近十年或以上
其中一幅喺豪宅地段
空置大約半個世紀
佐敦長樂街、上海街
都有地丟空十五年以上

香港嘅舖點解會長期丟空
大概有三種原因

第一種係業權問題
好似泰林咁三份業權
一場爭產官司就鎖死十幾年

第二種係制度問題
好似旺角街市咁
規劃、覆核、部門無人肯拍板

第三種係市場問題
好似愛海頌、利園山道咁
定位錯咗或者業主唔肯面對
租金已經跌咗嘅現實

三種原因都有一個共通點
就係蝕嘅唔止業主仲有成條街

一間巨舖落閘十八年
即係十八年無人流
隔籬舖少咗生意，條街少咗生氣
城市少咗一個本來可以有嘅用途

泰林個舖重開
唔係因為市道好咗
而係因為終於有人肯坐低傾

講到尾，一間舖丟空十八年
唔係舖嘅問題，係人嘅問題
當然，最重要係利益分配問題