https://e.pcloud.link/publink/show?code=kZvXQ77ZwE74UrsT1W0RSMNsKuHutSEu7nm7

港姐亞軍施宇琪化妝師事件
最近引起唔少人關注

好多人第一個反應好直接：
香港有好多化妝師都無嘢做
點解要畀內地人嚟香港搶飯碗？

如果只係限制外勞嚟香港
就可以解決香港嘅就業問題
咁就唔會有失業問題啦

香港同內地嘅跨境往來愈嚟愈方便
人口流動會帶動工作機會
自然會產生外勞問題

2018年7月28日
國務院印發
《關於取消一批行政許可事項的決定》
全面取消港澳台人員在內地就業許可

香港人可在遵守規定情況下
在內地做嘢而唔會被視為外勞

內地改咗與香港相關嘅外勞政策
香港無作出「對等」措施
內地人嚟香港工作，仍然係外勞
要遵守相關規定

內地人以訪客身份入境香港
唔可以接受有薪或無薪僱傭工作
唔可以開辦或參與任何業務

內地居民嚟香港做嘢
要先透過「輸入內地人才計劃」
或其他合適途徑，攞到入境處批准

入境處嘅基本要求包括：
有真實職位、與資歷或經驗相稱
薪酬符合市場水平
有關職位唔可以輕易由本地人擔任

內地人嚟香港做一日化妝
拍一條商業片、做一次直播
入境處若然視為工作
要先要過簽證呢一關

香港同內地嘅外勞規例出現唔對稱
係咪應設計一套更合理、更透明
更符合今天跨境創意經濟嘅制度？

喺商業社會優勝劣敗
公平競爭先至有進步
行業做得好，自然就會增加就業機會
而唔係以「保就業」為名
用行政手段干預合理嘅啇業運作
商界有句老話：
「最怕政府教我做生意。」

如果一個行業
永遠係「打擊外來競爭」
行業點樣提升技術？
點樣改善服務？
點樣建立品牌？
點樣走出香港？
更重要嘅，喺點樣吸引人才嚟香港？

化妝師、攝影師、主持人
剪片師、KOL、導遊、設計師
呢啲都係創意同埋服務行業

香港與內地客戶有唔同審美
有唔同語言需求
有唔同社交媒體市場

有人熟悉內地新娘妝
有人擅長港式影視妝
有人識粵語現場互動
有人有小紅書流量
有人有國際婚攝風格

術業有專攻
競爭未必係零和

一位外來化妝師嚟港參與大型活動
唔等於有一位香港化妝師
畀佢搶走工作

活動如果因此吸引更多觀眾
更多品牌合作、更多跨境客源
整個製作規模變大
可能創造更多工作：
燈光、服裝、攝影、場地、交通
宣傳、公關、後期、接待全部都受惠

唔係話外來和尚先至識得念經
而係諗經唔係和尚一個人嘅事

真正值得問嘅
唔係「外地人可唔可以嚟」
而係係咪以合法、透明方式嚟？
本地人係咪有公平競爭機會？
係咪帶嚟新增客源、曝光和消費？
係咪創造原本唔存在嘅生意？

呢啲先至係成熟市場應有嘅考慮
亦可以講係一種「鯰魚效應」

講番港姐化妝師事件

如果只係無得當局批准
「唔係香港人就唔畀做」
表面係保障本地就業
實質變成封閉式排外

外來化妝師如果技術更好、效率更高
審美更受市場歡迎
香港化妝師自然有壓力
有壓力唔係必然壞事

香港化妝師也可憑本地影視經驗
粵語溝通、熟悉本地明星和場景
可靠嘅現場執行、個人品牌
跨境平台經營，爭取更大市場

內地市場已向香港人開放
香港市場亦應看齊
呢個就係「對等」

唔係叫當局放棄保障香港人利益
而是規則應該係雙向
互惠互利先至可以雙贏

再講畀當局檢控「非法工作」例子

2025年10月17日至23日
入境事務處（入境處）
發現有內地攝影師利用社交媒體宣傳
聲稱可來港提供攝影及化妝服務

調查人員經過情報分析和深入調查
鎖定部份可疑人士，展開行動
以「放蛇」手法
於社交平台上喬裝成顧客
向涉嫌來港非法工作的
內地攝影師及化妝師
查詢及預訂有關服務
於他們來港提供攝影服務時將其拘捕

呢宗新聞喺小紅書
微信等多個平台
香港雅虎新聞等媒體上
引起廣泛關注同埋討論
網民議論內地攝影師
喺香港非法工作嘅問題
事件引發關於跨境工作
遵守入境法例嘅廣泛討論

內地攝影師帶內地新人
嚟香港拍婚紗照
遭到香港當局檢控
呢個係執行法例

但係現今社會情況瞬息萬變
法例若然唔作檢討
必與社會脫節

內地新人本來只打算喺內地拍婚紗照
因為某位攝影師提議
特地嚟香港取景
佢哋要住酒店、吃飯、搭車
購物、租衫、用場地、買門票
甚至喺香港玩幾日

呢啲婚紗照放上小紅書、抖音、微博
就是最好嘅香港旅遊宣傳
旅發局花大錢也未必做得到

當局近年最鍾意講「ＸＸ經濟」
花大錢宣傳
但就封殺具效益嘅「婚照經濟」

「保就業」唔係拒絕外勞
而係以外勞增加本地人就業機會

有競爭先至有進步，各憑真本事說話
港人近年北上消費就係最明顯例子