https://e.pcloud.link/publink/show?code=kZSIQrZD24KIkiaG1h1V5H2RGdydSNS47ay

今日想同大家講下，相機維修、行貨水貨，以至最近啲所謂「行政服務費」、「懲罰條款」，點樣一步一步將香港用家趕走。

先講一個好簡單嘅常識，相機喺正常使用下壞咗要維修，呢個本質係生產商嘅責任問題，唔係消費者做錯咗啲乜。

你買咗佢部機，跟足說明書用，無跌無撞無浸水，結果用唔夠幾年就出事，咁究竟係你唔好彩，定係產品設計、用料其實有問題？

而家，喺香港好似變成咗另一個世界。
手機影相夠晒方便，相機市場一早無以前咁旺，剩返仲肯買實體相機嘅，多數都係比較認真玩家。

喺咁嘅情況之下，品牌同代理唔係諗住點樣做好售後，留住呢班忠實客，反而係用一啲我會叫做「惡霸條款」嘅嘢，去懲罰嗰啲唔喺佢口中「正宗渠道」買機嘅人。

香港人聽到最多就係「行貨」、「水貨」。
講到「水貨」呢兩個字，好似你做咗啲見不得光嘅事咁，成日有人嚇你話：「喂，你買水貨呀，小心無保養喎！」
「小心到時壞咗，代理唔理你！」

行貨同水貨係咩？
好大部份只係同一個品牌，喺唔同地區發售，有唔同代理。

價錢出現差異，係因為品牌做咗「差異定價」，喺某啲市場定價高啲，覺得嗰度啲客有能力畀，喺競爭激烈嘅地方，定價平啲谷市佔率。

對消費者嚟講，只係畀錢買產品。
香港人無簽約話「終身效忠香港代理」，無話「唔喺香港買就係原罪」。

好多品牌，理論上都可以做「全球保修」，喺 A 國買部機，喺 B 國壞咗，可以搵當地授權維修中心跟進，頂多收返合理人工費。
香港普遍情況係點？
好多代理係用「保修」做武器，行貨先有香港呢個代理嘅「保修」。

若是水貨，唔係話唔修，但要收貴到唔合理嘅價錢。

簡單講，就係：「我唔只想賺你買機嗰筆，仲想用保修綁死你。」

再講另一樣大家好熟悉嘅劇情，部相機壞咗，你拎去香港代理或者某啲授權維修中心。
過咗保養期，一入門就先收你一筆檢查費，幾百蚊起跳。

之後，佢打電話畀你：「先生，你部機情況幾嚴重喎，我哋判咗係底板燒咗，要換主機板。」
然後講一個你聽到都會暈低嘅價錢。

問題係咩？
一，你肉眼睇唔到塊板。
二，你無技術驗證。
三，你唔知壞嘅根本原因係乜，係你真係用錯？係設計缺陷？定係原本用料就有問題？

互聯網上唔少玩家分享過經驗，有啲相機、鏡頭，送去官方維修，結果報價貴過買部二手機，好多人索性唔修，將相機、鏡頭「變磚」。

短期睇，代理賺咗維修錢，或者用家唔維修，索性買個部新機，代理又可賺錢。
長期睇，係趕走咗一個本來可能繼續用呢個品牌十幾年嘅客。

有啲品牌只出一份長長嘅價目表，寫住「基礎維修由 XXX 起」，實際幾多錢，好難估。

有啲只講「檢查後報價」，送咗部機入去，拆咗、檢查咗，然後報價，心理上你已經有壓力：「人哋幫我睇咗，唔好意思唔修啦。」

呢種資訊不對稱，就係令用家覺得自己任人宰割嘅根源。

最近有相機品牌喺香港嘅新安排真係好經典，公布話：針對平行進口產品，即係大家俗稱嘅「水貨」，送去香港維修，要收一次性「行政服務費」，可以由幾百到幾千，最高甚至去到幾千蚊級數，仲要寫明「不設扣減、退還」，唔會喺維修費度幫你抵銷。

即係點？就算最後決定唔修，或者發現問題好細，呢一筆高過維修費嘅錢一樣要照畀。
講白啲，呢唔係「行政費」，係「懲罰費」，懲罰你當初唔喺佢香港代理手上買機。

另一啲品牌，做法相對溫和。
水貨可以修，先收一筆幾百蚊嘅檢查費，如果決定修，檢查費可以扣返喺維修費度。
零件照正價，唔會幫你當行貨咁優惠。

你話完美唔完美？當然仲有改善空間。
但起碼佢哋係用「合理成本」去處理，而唔係擺明同你講：「你買水貨？好，罰你幾千蚊入場費先。」

喺一個自由市場，品牌要保護代理、打擊平行進口，係可以理解。

但你用嘅方法係乜？
係提升本地服務質素、拉闊保養範圍、甚至推全球保修，令大家覺得喺香港買行貨係「物有所值」，定係靠懲罰條款、玩心理壓力，令用家唔敢買其他地方嘅機？

相機市場已經今非昔比，全球出貨量跌到低水平，最近才剛有起色。
呢個時候，用呢種手段去「谷行貨」，實際上只係推走一批原本仲肯為你品牌使錢嘅人。

代理商亦都講明，相機如果唔交畀代理或代理授權嘅維修商維修，就算係「行貨」相機，日後都唔會提供維修服務。

呢種「壟斷維修」，令用家無法知道部相機出咗乜嘢問題，會唔會一句「燒咗底板」就收天價維修費，或直接講「無得整，買過部啦」。

講到維修，有個現象好值得討論，愈來愈多香港用家，壞機後唔係諗住搵香港代理，而係一腳踏過去深圳，直上華強北修理。

相機維修唔係核子反應堆，唔係全世界得原廠先識修。
華強北成個電子商圈，幾層樓都係搞電子零件、生意，手機、筆電、相機、鏡頭、監控、學習機乜都有。

技術人手多，零件來源多，競爭又大，自然要用價錢同服務去爭客。

喺網上搵「華強北相機維修」，會見到唔少店舖標榜：檢測免費，報價先決定修唔修。

維修項目有清晰清單：清潔、除塵、主機板維修、鏡頭調校，各有大約價。
有啲仲會拍片示範點樣拆機、清潔，畀你心裏有數。

同一部壞機，喺香港代理聽到嘅係：「先生，你部機底板燒咗，要換成塊主機板，人工加零件幾千蚊。」

你覺得貴得離譜，拎部機返嚟，帶去華強北。
華強北嗰邊，師傅拆開畀你睇，攞住放大鏡慢慢查，最後同你講：
「只係入咗塵，導致接點唔穩定，清一清、補一補，幾百蚊搞掂。」

如果真係出現呢種對比，香港代理收「天價服務費」同「亂扣大帽子」呢件事，好快就會被踢爆。
到時，仲會有幾多香港人願意再信你一次？

當然，我都要講清楚，華強北唔係每間鋪都係良心商戶。
你照樣要搵有口碑、有案例、有朋友介紹嗰啲專門整相機嘅師傅，唔好貴重器材亂交畀無名小店。

當一個地方嘅維修文化強調「透明報價、唔修唔收錢」，另一邊就係「檢查費先收、再講個你聽唔明嘅診斷名」，用家自然會用腳投票。

喺法律上，香港有《商品說明條例》，入面提到唔少「具威嚇性嘅營業行為」例子，重點係商戶唔可以用恐嚇、誤導、唔公平手法，令消費者喺壓力之下作出本來唔會作嘅交易決定。

內地最高法院亦講得好明白，啲格式合同如果無理加重消費者責任、明顯違反公平原則，可以被認定為無效或者部份無效。

所謂「惡霸條款」，就係表面上掛住「公司政策」、「行政安排」四個字，實際上係利用自己嘅市場力量，對消費者講：「你要嘛一開始就喺我度買行貨，畀我定嘅高價，要嘛之後出事，返嚟畀我任砍一刀。」

呢種玩法短期內可能幫到代理「立威」，好似同水貨商講：「你哋唔好諗住靠我香港維修中心。」
長遠嚟睇，佢係幫競爭對手做宣傳，用家會諗：「不如直接去日本買，保養清楚、服務好過你。」

又或者「反正香港代理都唔友善，我索性轉品牌，維修都唔靠你。」

當香港用家集體覺得：「喺香港買相機係畀人睇死，上深圳或者飛去日本買，服務更好，價錢更合理。」
最後捱唔住嘅，唔係消費者，而係仲以為自己喺度做大佬嘅香港代理商。

節目最後，唔係淨係鬧，我都想畀幾個實際建議大家考慮。

第一，用腳投票。
買大件器材前，認真比較香港行貨、日本、內地同其他渠道嘅價錢同保養條款，唔好被「行貨就一定最安心」呢句口號呃到。
你可以自己做一張表，睇清楚每個選項嘅售後服務係點樣寫。

第二，要求維修透明。
相機壞咗送修，記得問清楚：檢查費幾多？唔修會唔會照收？有無書面報價？可唔可以退回舊件？

所謂「燒底板」、「主機板壞」有無相、有無證據？
減少資訊不對稱，起碼令自己唔好咁被動。

第三，善用民間維修資源。
除咗原廠，香港、深圳、台灣等地，都有好口碑嘅相機維修店，公開價目表，清潔保養幾多錢、維修幾多錢寫得清清楚楚。

當然每次交機前，都要自己做功課，同人查下口碑。

第四，多反映、多投訴。
遇到覺得唔合理嘅所謂「行政費」、「懲罰式條款」，唔好淨係喺朋友圈呻兩句。
可以向消委會、監管部門、甚至品牌總部投訴，至少留低記錄，亦都畀其他用家知道呢啲條款點樣運作。

最後，我想講嘅係，企業有權設計自己嘅賺錢方法，但消費者都有權選擇自己嘅消費方式。
一間公司覺得，用「惡霸條款」綁死客戶比提升服務更加重要，咁佢遲早會發現，最終被懲罰嘅，唔係啲所謂「水貨客」，而係自己個品牌。

你最近一次維修相機，畀咗幾多錢？覺得抵唔抵？
喺下面留言講吓你嘅故事，多謝收睇／收聽，《今日講呢啲》，下次見。